كـتـاب ألموقع

زوبَعَه... // سيمون عيلوطي

• 

تقييم المستخدم:  / 0

سيئجيد 

المجموعة: سيمون عيلوطي

تم إنشاءه بتاريخ السبت, 27 أيلول/سبتمبر 2014 17:56

كتب بواسطة: سيمون عيلوطي

الزيارات: 2191

اقرأ ايضا للكاتب

زوبَعَه...

سيمون عيلوطي

هَالزّوبعه الْ هَبّت عَ غَفلِه....

كَسّرت جِسْر التّلاقي

مع تَفاعيل الزّمن،..

جَرْجَرَت روح الصّحارى

عَ الجّنايِن...

وِالمسارِح وِالطّرَب،..

دارَت السّاعات،.. تجري للخَلِف

تِفْتَح سْواق العبيد..

وِالجّواري بِالمَزاد،..

حالِة سَواد..

خيّمَت وِالجّهْل عاد!!

***

أجسام سودا مْقنّعه..

فِلْتَت بِليلِه غيّرَت شِكْل القمر

صَحّرَت وَهْج العُقول

وِالحُقول

وِالبداوي وِالحَضَر،..

راجَت صور..

شو شِنْعَه عنها مَ انْحكى

لا بِرجْفات الرّعُب..

لا بِالبُكا..

حَيّات تِطْلَع من تَجاعيد الوَطا*

شي صفرا شي زرقا

ومنها مْرَقّطَه...،

شو يْروج فِكْر الطّرْطَقه

يِنْخِفِض كَرّ الكَنار...

يِهْوي زِزّ الزّنْبَقه!!

------

الناصرة:27-9-2014

------

*الوَطا: الأرض

• < السابق
• التالي >