كـتـاب ألموقع
الله! على كل ظالم وحرامي سرق أموال الشعب العراقي// عباس طريم
/ 0
- المجموعة: عباس طريم
- تم إنشاءه بتاريخ السبت, 01 نيسان/أبريل 2017 18:43
- كتب بواسطة: عباس طريم
- الزيارات: 2919
الله! على كل ظالم وحرامي سرق أموال الشعب العراقي
عباس طريم
اريزونا
الناس كلهه اتغيرت , ياللاسف
عصت ربهه , ومشت بدروب
الترف
+
لا تذكرنه .. ابخلق ذاك الزمان
زمن ذاكه.. ابخير وبطيب
انعرف
+
للاثم شدينه , وابشطه الغميج
منه شربت ماي, كل واحد
غرف
+
الناس , كلهه اتغيرت , يبن الحلال
المال , بس المال صار الهم
هدف
+
والثكيل الوزن , واتظنه رزين
طار وياهم .. بعد ما وزنه
خف
+
واللي حافظ عالصفات الطيبات
ويه هذه الموج , والهوسه
انجرف
+
المال , هذه اليوم سيطر عالعقول
وسلب كل رحمه , ومحنه
امن السلف
+
احنه صرنه اليوم .. بياعت كلام
ايجذب الحجاي , حته لو
حلف
+
عدنه .. الة عود , قانون, وكمان
وكلنه فنانيين .. وانجيد
العزف
+
احنه ..اهل الغدر , والشر والنفاق
ابليس, وسط احلوكنه ابصوته
هتف
+
نطعن الصاحب ابظهره .. ومن يفيق
ابترس ادينه , وبالوجه
نطيه جف
+
نشرد امن الطيب , الابعد مكان
والردي البينه.. نجيه نزحف
زحف
+
احنه شط .. اتلاشه من كثر النفاق
ومنه ماظل غير , اثار
الجرف
+
احنه جلمة .. وجلمه معناهه جبير
انقرضت , وظل منهه واضح
بس حرف
+
الوصف حدد , كل جماعة ابكل زمان
واحنه .. بينه احتار شيكول
الوصف
+
كلشي عدنه انكلب , صار الغش حلال
وصار بالغش والنصب , النه
ملف
+
والشعب .. مسكين حاير بالجراح
مسلم امره , وماخذه الدم
والنزف
+
واللي سبب هالمتاعب والعذاب
عينه ما تنكسر من شعبه
وصلف
+
واضح , المسؤول .. يضحك عالذقون
ومن يخاطب ناسنه , ايدور
ويلف
+
الله عادل ! والظلم لتظن يدوم
اليوم لو باجر , يبان
وينكشف
+
راح تتفاجأ يبو السان الطويل
وراح صوتك بالحقايق
يعترف
+
ما يعوفك شعب , راويته الجحيم
وراح تدفع كل فلس بكته
ابألف
+
عباس طريم
المتواجون الان
813 زائر، ولايوجد أعضاء داخل الموقع
