كـتـاب ألموقع
اشمال حظ اعناد يركض للامام// عباس طريم
/ 0
- المجموعة: عباس طريم
- تم إنشاءه بتاريخ الأربعاء, 13 أيلول/سبتمبر 2017 09:51
- كتب بواسطة: عباس طريم
- الزيارات: 3877
اشمال حظ اعناد يركض للامام
اوحظي عكس اعناد يرجع ليوره
عباس طريم
اريزونا
اشمال حظ اعناد يركض للامام
وحظي عكس اعناد يرجع
ليوره؟
+
هذه شي مقسوم , من رب العباد
لو عمل شلموده عمتي
ياتره ؟
+
عمتي تأخذ خيره , وتحضر الجان
وتشتري العذراب والشر
مشتره
+
رحت .. اكصد حجي كاطع اشكي ليه
وفصلت كل ما حصل لي
وما جره
+
وكتله : نايم حظي .. مثل اهل الكهوف
يشخر , ورجليه وديه
امبتره
+
حظي .. شالوه اونفوه , بره البلاد
والبخت سحكو عليه
بالقن
+
والامل .. منعوه حته امن المرور
وراحله .. الشرطي زبون
اوحذره
+
ابطانة اجيوبي نظيفه , اوتستغيث
ودومهه .. اتغني ابقصيدة
حايره ]
+
وحالة الافلاس , من يوم الوعيت
صارت الكل الخلايك
ظاهره
+
كال : ياحافي تبشر بالجنان
هناك .. كل حافي .. الاله
ايقدره
+
ابني , كل مفلس اهناك ايقدموه
والغني ابيوم الحساب ايظل
وره
+
ابقه كاعد عالحديده , اوما عليك
اهناك .. كل صعبه وشديده
اميسره
+
المفلس ابدنياه , اوحافي ابهاالحياة
ايصير اغنه الناس يوم
الاخره
+
اصمد .. وخليك صابر كالحديد
وصلي اوسبح الربك
واشكره
+
ابني أخذ احجايتي, وظل عالكفاف
واكل خبز اوجاي بس
لتكثره
+
دير بالك .. تكرب الاكل الدجاج
واللحم مسموح الك بس
منظره
+
خلي بطنك .. فارغ اليوم الحساب
وبالك .. الاكلات طيبه
اتجرجره
+
وكال : بويه اسمحلي رحمه الوالديك
, اني جوعان .. اوهتف
ياجوهره
+
بويه جيبيلي الغده .. اوطب الكباب
اوخبز حار , اوهسه خابزته
المره
+
اوسمجه مشويه , تدور عالبخيت
اوصحن بيه اجمل دجاجه
امحمره
+
اوتمن اوتشريب وأنواع العصير
اودولمه اتخبل , اوكبه
امدوره
+
والفواكه .. حاضره ابكل الصنوف
كلهه مغسوله غسل
وامكشره
+
الحجي يثرد .. وانه اباوع عالثريد
لحد ما خلص عليه , عن
اخره
+
قدر محتوم , ايده نزلت عالصحون
وجابهن.. لحسا وبلعا
بالسره
+
ظلت الصينيه تصرخ , يامغيث
اتصيح شيلوني لياكلني
تره
+
وهجم اخر جوله .. عالماي الزلال
ومن شبع .. تمتم بشافيه
اوقره
+
ردت بس ايكلي : سمي , مد اديك
وعادة المضيوف , ضيفه
ايقدره
+
أيست .. من مسح كل هذه الثريد
اوحط عطر بيده اعله جسمه
اوعطره
+
كتله حجي امبارك , ابلحس الصحون
نظفتهن , بيد حلوه
وماهره
+
انته موكتلي ابتعد عن الدجاج
واللحم , والكبه , جا هسه
اشجره؟
+
شو لعبت افنون , بالاكل الجميل
مثل "مسي" وراوغ الكل
بالكره
+
نزلت ايدك عالاكل مثل القضاء
الساعه السبعه , اوخلصت
بالعاشره
+
جابو الصينيه تضحك , بين اديك
اورجعة الصينية حيل
امكشره
+
كالي اسمع ياوليدي , اني غير
اوجيلكم مثل الشواذي
اكثره
+
لا كلام , ولا نصيحه ايفيد بيه
ورغم كل هذه , نرد
ونحذره
+
احنه يا مفلس , كلتلك احنه غير
اتقارن اشلون , الثريه
بالثره
+
كتله : اجيتك اشكي من نحس الحياة
بلجي هذه النحس تكطع
دابره
+
بلجي عوذه , اقرايه, تهديني الطريق
درب الفلاس الكتلني
ايغيره
+
وبلجي ربي ايعيد للحظ , الحياة
ويدفع ابعبده الذليل
اوينصره
+
اني ياحجينه , ما اريد الجنان
اوحجيك الغيري حبيبي
وفره
+
اطيني صينيتك , المالذ وطاب
بيهه , وارميني ابصقر
بالاخره
+
انته وامثالك .. تعيشون برفاه
واني اتاني الجنه , اظل
لازم سره
+
انته تاكل سمج , وأنواع اللحوم
وتنصح ابها الناس .. تاكل
بس ذره
+
انته نازل دوس , بالوز والدجاج
وبالخبز يابس , الغير
اتبشره
+
انته عود اتكودني الأرض النجاة؟
لا حبيب الروح , حجيك
!قشمره
+
انه .. اريد اكتب شعر , ليل اونهار
بلجي رب الكون اكسر
خاطره
+
وارد اعاتب بالشعر , رب الجلال
واطلب الغفران , وارجو
المعذره
+
ليش ميزانية الكل .. بالحياة
امتلتله اومليانه , وانه
امصفره؟
+
وليش كاع الناس , مليانه ابخضار
اوكاعي من دون العباد
امحفره؟
+
اوليش ظلمه وظالمه اوياي الحياة؟
اوليش وي غيري, الحياة
امنوره؟
+
االدنيه ما كصرت , وي كل العباد
ليش بس وياي , حيل
امكصره؟
+
اوليش حته البيسكل , ويه الصباح
من اريد اطلع.. اجروخه
امبنجره؟
+
اوليش كاطع , ياكل ابمطعم طبيخ؟
وانه كل يوم اليمر , ماكل
[ …. ]
عباس طريم