كـتـاب ألموقع

حاط الله اوياك يابو لعيبي// عباس طريم

عباس طريم

 

عرض صفحة الكاتب

حاط الله اوياك يابو لعيبي

ظلت اتون من وراك البيبي

عباس طريم

اريزونا

__

من تجينه  اتضيفنه , وتطرق  الباب

جدتي  تتذكر   ايام   الشباب

اتكلك اهلا ياكبد طال الغياب

ارجوك  لا  تعزف  على   تعذيبي

+

من تجي وترمي على الكوم  السلام

تكعد اتسولف عله الحب  والغرام

هيجت  جدتنه ,  يا ابن  الحرام

وذكرتهه ابجدي حجي اعريبي

+

اتكوم تركض من تجي , اتسوي الجاي

اتصبلك اوتوميلك , اكرب يمي جاي

ابحجة احجمني اويوجعني  كفاي

اتكلهه حاضر للحجم , وابشيبي

+

سودنت جدتنه ياابن الطراك

ماكو غير الزايره ابارض العراك

اتسوي تشريب وتحطه بالطباك

اتكلهه جربي وضوكي من تشريبي

+

ولك يابو لعيبي ما عدك ضمير

اللعب وي جدتنه هذا امر-ن خطير

اوياك بس الحرب ينفع  والنفير

يلي ما غزر ابعينك طيبي

 

 

+

ولك يابو العيبي  سودنت العجوز

هذه عدنه احنه السواعد , لا يجوز

ولك يوميه تجي امحمل  الموز

اتكلهه اكلي , اوروح ابوي اطيبي

+

جدتي اول تالي تسهر ما تنام

وعالسرير اتغني ياطير الحمام

لبو العيبي ارجوك وديلي سلام

وكله ,  يمدوخني  رد  اكليبي

+

جدتي اتكول انه بس كتله هله

ورد عليه , ياهله ابريم الفله

كال متزوجه ؟ وكلتله  ارمله

وكال مهرج ياغزال ابجيبي

+

لا تطردون ابو العيبي , خل يجي

شسوه قابل باسني , شوبس حجي

من يجي , يحضني ويصير البجي

انكله شنهي ؟ ايكول مات اعتيبي

+

بويه جا خليه يجي , ايجيب المهر

كبل  لا  بين  الطوايف   ننشهر

وين ابو لعيبي , لقد اصبح صهر

تريده  حي ميت  , اليوم البيبي

+