كـتـاب ألموقع
عتاب الى جيفارا العراق ...!// عبد الرضا المادح
/ 0
- المجموعة: عبد الرضا المادح
- تم إنشاءه بتاريخ الأربعاء, 10 تموز/يوليو 2019 10:00
- كتب بواسطة: عبد الرضا المادح
- الزيارات: 2208
عبد الرضا المادح
عتاب الى جيفارا العراق ...!
عبد الرضا المادح
ها يا حسن خويه ،
شو طالت غيبتك بويه ..!
يا حسن ..
تدري شلون حالتنه ،
وداعتك ،
وداعة هيبتك ، والتِـفكَـ ، و حمرة البيريه ..
ماضلت ذيج لمتنه ..!
ابكَـباحه ،
حركَـوا روح رِفكَـتنه ..!
تاريخ ومواقف كلهه منسيه ..!
لا هيبه ..!
لا كرامه تصون ديرتنه ..!
وصلتلك يا نجر ، ذيجه رسالتنه .. ؟
لو بالعـَـلِـس راحت قراءتنه ..!
لا.. همهم فكر ،
لا.. طيبة النيه ..!
يغِشـّـون بكلام مرتب او موزون ،
ويغلفون الجذب باشعار ورديه ..!
امْـراكضهم يصير بكًعدة الديوان ،
ويرتبون ( النصر ) ،
بصوات وهميه ..!
آآآآ..ه.. من الزمن ،
آآآآ..ه.. من الزمن ،
ثـِكَـلْ ضيم الحزن بكَلوب مجويه ..!
وانهض يا حسن ،
لا تكَول شعليه ..!!
عبد الرضا المادح
07-07-2019
* جيفارا العراق الثائر حسن سريع .
المتواجون الان
587 زائر، ولايوجد أعضاء داخل الموقع
