اخر الاخبار:
توضيح من مالية كوردستان حول مشروع (حسابي) - الأربعاء, 27 آذار/مارس 2024 19:18
  • Font size:
  • Decrease
  • Reset
  • Increase

كـتـاب ألموقع

دارميات مهداة الى وطني// ميسون نعيم الرومي

تقييم المستخدم:  / 0
سيئجيد 

ميسون نعيم الرومي

 

عرض صفحة الكاتبة 

دارميات مهداة الى وطني

ميسون نعيم الرومي

 

هم غيم اومطر ليصُبّ والشمس بالكاد

لوبيدي ازيح الغيم وارويهه (بغداد)-

***

يروي عطش بغداد (لللـِعـَـب) بيهه

يـطـرد غـبار الشــر خـيـَّـم عـليهه

***

لا يا غبارالشرعشعـشـت عـِـدنه

مدري السبب ندراه مدري وعدنه

***

عوز او تعب وادموع والفگر لاطي

خلانـَـه منكـوبـين نحسب قـواطي

***

شـفـتوا گـبل خريـج يشـتغـل حمال ؟

ظهره انحنه امن الجور يلبس بالاسمال

***

هم شفتوا عدنه اطفال..اطفال الشوارع ؟

تـلگـفهم الإيـديـن والـسمسـره انـواع

***

و(الخزنه) تبچي الجوع .. والنفط نجـّم

مزروفه چنهه (اتخـِـر) وين اللي يفهم

***

وانـّـوبـَه شفتوا هم .. (هم) الرشاوي ؟

لو شغله عندك غاد .. ساوم اوتاني

***

سمعتوا گبل (مسؤول) امزور شهادات ؟

شـكـبن واخذ هاليوم باعـلى القيادات

***

شفنه العجب يا ناس بارض الحضارات

ماكو عـِـلم .. تنقاد .. بالإسـتـِـخـارات

***

خيـّم علينا الذل والجهَـل ..عقـديـن

راح العراق انداس باسمك ياهالدين

 

***

و(المرأة) شوفوا شلون هم خلـِـفوهه

من عمر (تسع) اسنين شو زوجوهه

***

و(المغتصب) شـوفـوه محـّـد يـردعه

يتزوج ضحيته اشلون ! تگدر تجرعه ؟

***

خرّبـوا بالدستور.. واهوايه مسخوه

يشـتغـل للأحزاب والشـعـب ذلوه

***

كمموا بالأفواه والينتقد صار..

ينسجن كومه اسنين..والشعب طشار

***

بين الدول طشار ولدك (يتشرين)-

لو حبس لو طلقات !! وين القوانين ؟

***

وانـوبـَه شوفوا شـلون أم المصايـب

تتعارك الأحزاب امن اجل المناصب

***

تـتـقـاسـم الخـيـرات والوطن ضايع

صاير خرابه اطلال والشعب جايع

***

نترجه كون ابيوم تشرق شمسنه

تـنغسل (هالأدران) ينظف وطنه

------------------

3/حزيران/2021

سـتوكهولم

 

للاتصال بالموقع

عنوان البريد الإلكتروني هذا محمي من روبوتات السبام. يجب عليك تفعيل الجافاسكربت لرؤيته.

عنوان البريد الإلكتروني هذا محمي من روبوتات السبام. يجب عليك تفعيل الجافاسكربت لرؤيته.

عنوان البريد الإلكتروني هذا محمي من روبوتات السبام. يجب عليك تفعيل الجافاسكربت لرؤيته.