كـتـاب ألموقع
صديقتي مديحة لازال في العمر بقية// ميسون نعيم الرومي
/ 0
- المجموعة: ميسون نعيم الرومي
- تم إنشاءه بتاريخ الثلاثاء, 15 كانون2/يناير 2019 10:46
- كتب بواسطة: ميسون نعيم الرومي
- الزيارات: 2832
ميسون نعيم الرومي
صديقتي مديحة عبد الرزاق الزبيدي
لازال في العمر بقية
ميسون نعيم الرومي
يا مديحه .. يا مديحه
يا وجع روحي المنشتل
يا دمع عيني المابطل
يا عطر ورد الربيع
يا نبع دجله اوالفرات
يا نخل كل العراق
يا شعاع الأعظميه
يالوفه اوطعم الحنين
آنه ادور .. وانتِ وين ؟
شكتب آنه اوشرد اگول
غفله رحتي ابلا وداع
ابعيني انت .. اشلون رحتي؟
كلشي راح او كلشي ضاع
بالوطن صاحوا مزاد
حكموا اوغاد البلاد
يا مديحه...
گلتي ردي ..
كافي غربه ..
كافي تعبنه الونين
جارت اعلينه السنين
يا صديقة عمري ويـن
والوعـَد .. يحبيبه ديـن
يالوعدتي..
اوما تنيتي !
يا مديحه .. اويا مديحه
وينچ انتِ او وينه فيـّچ
ابلحظه غبتي اوراح ضيچ
ظلمه بعدچ .. يا حسرتي
والوطن يبچي حزين
حبيبه .. تعبنه الحنين
بعدچ آنه انكسر ظهري
لاگمر ظل .. لانجوم
صرنه نحصد بس هموم
يا مديحه .. ياللي رحتي
يا صديقه اويا صدوقه
گلتي ردي واتفقنه
غفله رحتي..
اوما تنيتي
يا مديحه .. وانتِ وين..
وآنه .. وين..
يا .. مديحه..
-------------------
11 / كانون الثاني/ 2019
ســـتوكهولم