كـتـاب ألموقع

ردنه يا زمن// ميسون نعيم الرومي

• 

تقييم المستخدم:  / 0

سيئجيد 

المجموعة: ميسون نعيم الرومي

تم إنشاءه بتاريخ الأربعاء, 10 تموز/يوليو 2019 19:14

كتب بواسطة: ميسون نعيم الرومي

الزيارات: 2112

ميسون نعيم الرومي

عرض صفحة الكاتبة

ردنه يا زمن

ميسون نعيم الرومي

ردنه يا زمن .. الله اعليك رد بينه

يا ليل السَهر .. شو ناسي !حاچينه

ماي او للعلو .. هيهات يصعـَـد فوگ

ماي اللي تـِـبـَـدَّه .. عيب اتلمه ايدينه

راح العـمر واتعديت .. ما بگيت

خلك عَ البعـِد .. مـو كافي تاذينه

ملينـّـه القهـَـر والحسَـره والآهات

زمن هذا الوكت تـِسـْـعـَـر چوانينه

تـِـضل اتوجْ ما تهفت .. تچـَوّي الروح

تـِلهـَـب بالگـَـلب .. وابناره تچوينـَه

تـِعـَـلمنـَه السكوت او حرگـَة النسيان

نبچي ابلا دمع .. والزمن يـبچـيـنـَه

مامش جرح ينزف دوم ! يـوم ايهيد

جرح البلگلب مـَـنـْروفه .. يدمينه ..

رد يا زمن رد بينه

الله اعليك رد بينه

***

رد النـوب احلفـَـك بالله رد بينه

الزخات الفرح والضحكه عَ الشفتين

البساتين النخل .. واللمه والخلان

لعثوگ الرطب والعنب .. مايع تين

والتكي العـَـسل .. بشليلي المن بيه

خستاوي النبگ .. يعراقي حلو الطين

من ابعيد .. أسمعـَن عزف حزن الناي

ياصوت الجنوب اوحزنه بي تلحين

نثرتيه الشعر شمس العصر محلاچ..

حضنتي بالنخل صليتي عَ الجرفين

يروي بالعطش ينعش بگايه الروح

يا دجله العذب ! والماي دمع العين

تحن روحي الك .. كل العمر اشتاگ

تسري اويه النبض .. ذكرى اوتسلينه

رد يا زمن للفرح .. رد بينه

كافي يازمن بسك تعادينه

الله اعليك .. رد بينه

------------

تموز / 2019

ســتوكهولم

• < السابق
• التالي >