كـتـاب ألموقع
ارد اسألك يشباط// ميسون نعيم الرومي
- المجموعة: ميسون نعيم الرومي
- تم إنشاءه بتاريخ السبت, 08 شباط/فبراير 2020 18:50
- كتب بواسطة: ميسون نعيم الرومي
- الزيارات: 1834
ميسون نعيم الرومي
ارد اسألك يشباط
ميسون نعيم الرومي
ارد أســألك يشـباط يالجانـَـه..
ليـش ابجيتك تتطشـَّـر ادمانه؟
اوليش الأمم تزهر ارضهه ازهور واتغني
واحـنـَه امن الهضم وجـَّـت بگايانـَه
***
ارد اســألك والدَمع نهـران عَ الخـَـديـن
ليش العراق ابكل وكـت مظلومه شبـّـانه؟
والأم العراقيه تنبش بالأرض..واتريد ابنهه ايعود
او ليش امهات الناس تنطر ولدهه اوبيهه فرحانه؟
***
كل الدول مســروره بالثـَـروات وامكيـفـَـه
حصتنه امن النفط..ذل اوقهر..وادموع منهانه
ابذيچ السـَـنه يشـباط .. من گبل (ســت) اعـقـود
لـَمـّـوا بالشـــبـاب .. اومـردَوا اچـْـلانـَـه
***
صارت مجـْـزَرَه .. واعـتـِدَوا عَ الحـرّات
مغسولين..ما عدهم شرف.. يا سـبب بلوانه
-(وصفي،اكريم اومهداوي) بيرغ للعراق اوعز
كتلوهم غدر .. وانباع العراق اوخرب ميزانه
***
وابـواب الجـَحـيـم انفكت ابذاك اليـوم
تـطـْحـَـن بالشعب..مابـَطـِلـَـت دنيانـَه
شـو راح الفـَـرج..من أهـَـد ذاك اليوم!!
صرنه ع الحديد..والخير الغلگ بيبانه
***
تاريخك يا (عراق) اتجدد اوچا ليش ؟
مظلومه ظلم هالناس..جوعانه عطشـانـَه
شـحچي..شـَـگولـَـن! (يشباط) بسـَّـك عاد
مـن دون الدول لعراق .. مـَسـْـبـيه شبانه
***
إغدرت (يشباط) ماخليت..اجداد والآباء والأبناء
رديـت اوعلى (الأحفاد)..واشــمالك اويانـَه؟؟؟
ارد اسألك يشباط هاليوم اوباچر اوكل يوم
ليش ابجيتك كل السنين اوهالسنه .. اغدرت اويانه؟
-------
اهديها الى وطني بمناسبة مرور57 سنة على انقلاب 8/ شباط/ 63 الأسود
-------------
8/شباط/2020
ستوكهولم
المتواجون الان
740 زائر، ولايوجد أعضاء داخل الموقع