كـتـاب ألموقع
افتي .. يالقضاء// ميسون نعيم الرومي
/ 0
- المجموعة: ميسون نعيم الرومي
- تم إنشاءه بتاريخ الجمعة, 29 أيار 2020 19:12
- كتب بواسطة: ميسون نعيم الرومي
- الزيارات: 2112
ميسون نعيم الرومي
افتي .. يالقضاء
ميسون نعيم الرومي
حنطه اتفرهدت والبايگ (احميمات)-
افـتي يالقضاء اوبـَـرر البوگات
بيك اويحتمي كل سارق اومحتال
يطلع تبريه وامحلله السرقات
***
يغلق بالدعاوى وايبري بالسراق
يتآمر ع الوطن او ينفي بالتهمات
ايغطي ع الفساد الحجه (عمر اچبير)-
-(وازغير العمر) ينظرله بالرأفات
***
الآف الشباب امغيبه مدري وين
أطفال اتيتمت واترَمـّـلـَـت زوجات
ما دامت أبد واليشــهد التاريخ
عدوان الشعب عَ الوطن عالآت
***
سلطه من ورق تحتال ع القانون
واحزاب الدجل تتقاسم النفطات
ضايع يا وطن واشلون چا نلگاك
مرجوحه صرت واتمرجح الجارات
***
منريد الچذب والچذب حبله اگصير
چنك منتشي عَ الكرسي والشارات
ما شفنه عمل بـس الحچي والگول
ابـدي بالعقاب او عـلي بالرايات
***
ما ينفع ندم تـنداس بالرجلين
اصحه واتعظ لا تنفش الريشات
حنطه اتفرهدت والبايگ (احميمات)-
افـتي (يالقضاء) اوبـَـرر البوگات
------------
29 / آيار / 2020
ســتوكهولم
عنوان البريد الإلكتروني هذا محمي من روبوتات السبام. يجب عليك تفعيل الجافاسكربت لرؤيته.