كـتـاب ألموقع
كلما يهل الگمر// ميسون نعيم الرومي
- المجموعة: ميسون نعيم الرومي
- تم إنشاءه بتاريخ الأربعاء, 03 حزيران/يونيو 2020 18:50
- كتب بواسطة: ميسون نعيم الرومي
- الزيارات: 2210
ميسون نعيم الرومي
كلما يهل الگمر
ميسون نعيم الرومي
كلما يهل الگمر
اتمعنن ابنوره او احن
نجمات چن زفة عرس
والليل كحله للرمش
السمه شذرات اوضوت
عالرگبه گردانه
النخل يتمايل غنج
غنوة فرح بسمانه
والنسمه وي طرت الفجر
غنت فرح نهرانه
يادجله يالمايك عذب
حلم اوأمل عنوانه
***
الموج عالي يابحر
والروج يتهاده اويرد
نوبه ابفرح نوبه ابغضب
الريح تلعب لعب
ما تنحزرلا تنعرف
مركبنه ضاعت وجهته
قبطانه تاهت عرفته
متعوب يا ليل السفر
والعمر راح اتعده
الصبر گاعه مولحت
ماضن يخضر ورده
أحاه يا ديرة هلي
خيرچ الغيرچ عده
***
حرگوا الحنطه والشلب
فلاح دمعه ابچفه
عامل يحومي ع البعد
تحفر العبره ابخده
چم دوب نبچي اوننتحب
والحسره تچوي بالگلب
يا لليل عـَـشعـَـش بالبلد
ناشر عباته اوحزنه
واشعلنه شمعه للشمس
يوم او تمر تذكرنه
اتعبنه يادنيه بعد
من محنه نغزل محنه
***
الوطن باگوه الوطن
لتگول يمته اوتحن
اسكت اومامش رجه
مات الحلم بسك تون
كافي يروحي بعد
طالت اسنين البعد
والعين تربي اوترد
تترجه يوم امن الصبخ..
يزهر او ينبت ورده
سيس بلمنه ابلا هدف
والدهر يلعب بينه
لاچنه رحنه اوجينه
لاچنه رحنه اوجينه
---------------
2 / حزيران / 2020
سـتوكهولم
عنوان البريد الإلكتروني هذا محمي من روبوتات السبام. يجب عليك تفعيل الجافاسكربت لرؤيته.
المتواجون الان
387 زائر، ولايوجد أعضاء داخل الموقع