كـتـاب ألموقع

صرخـَـة الأكـــراد// ميسون نعيم الرومي

ميسون نعيم الرومي

 

عرض صفحة الكاتبة 

صرخـَـة الأكـــراد

ميسون نعيم الرومي

 

هبـَّـت الأكراد ثارت – (كاكه) وايهز الجبال

(خوشـْكـَه) ايدچ اوإيده – اتعيش أوطان ابدلال

ولد كردستان ثوره – اتـْعـَـلْموْ ادروب النضال

(زورباش) اوأحله چلمه – او(چوني قربان) اللـّي گال

ابدمهم اوكـِـتـْبـَـوْ احروفه – عهد ما يعرف محال

(جـَـنـَّه) من يـِنـْظـَـف وطنه – مو حكم قادة أنذال

مو حكم للذيل أبـْـداً – والذي ايحب الجدال

إيد بيد اويه الجنوب – ننتصر ماكو محال

شعب واحد هدف واحد – للعراق اودمنه سال

من أجل تحرير أرضك – يا (عراق الخير) إجنوب اوشمال

(ساحة التحرير) صاحت – جاوبت (ذيقار) كلهه ..

 و(النجف وديالى) نهضت – او(كربله) او (بصره) او (بخال)*

(واسط اوبابل) الفزعت – او(قادِسِـيـّةْ) هالنضال

 و(الْسِليـمانـِـيـّه) هـِتـْـفت - اتبوس هامات الرجال 

صوت واحد كلهه صاحت – طائفيه ما نريد اولا انحلال

نـِعـْـدل او گال المـَـسار – نبني مستقبل اطفال

امـْنِ الاوغاد الوطن يرجع – سلم نادوا مو قتال

انحاكم اللي ظلم شعبي – المحكمه اتسأله السؤال

باگوْ اوهـِـدْمـَوْ بـَلـَدْنـَه – والوطن أصبـَح اطلال

يدّعون اعبادة الله – او غرگوْ ابسـحت اوضـَلال

چـِـنـَّـه أول .. نبـْـقـَـه أول – ما نصير ابدا التال

نبني وانعـَـمـْـرالعراق – نبني بيتك والجمال

فدوه يـرْجال او شباب – انتوا ثروه والأَمال

انتوا عزتنه ! اوكرامه – أمل بـَـعـْمال  الابطال

فدوه عيني يا وطنه – اكسر اوحـَـطـْم الاغلال

هبـَّـت الأكراد ثارت – (كاكه) وايهـز الجبال

(كاكه) وايهـز الجبال

-------

*(بخال) قضاء بيخال من اقضية السليمانية

 في كردستان العراق

--------------------------

10/ ديسمبر/ 2020

ســتوكهولم