كـتـاب ألموقع

للمـوت باعـونـَه// ميسون نعيم الرومي

ميسون نعيم الرومي

 

عرض صفحة الكاتبة 

للمـوت باعـونـَه

ميسون نعيم الرومي

 

رحتي ياسنة عشرين يا شينه – والبعد اليجي ماندري مضمونه

ذبـَحتي بالوريد اگـْطـَعتي شريانه – كل الدول فلـْسَـت صفت مديونه

ناس امبربده ما تدري وين اتروح – مشافيهه امتلت والموته مركونه

يا سنة التعب والموت..فكــّـينـَه – راحت ماترد هالسنه المجنونه

***

عشرين المشت (كوفيد) خلـَّـته – ينهش بالبشر وامكشر اسنونه

طاير هالإجه اوهالماد ذرعانه - يخنگ بالنـِفـَـس مصحوب بصخونه

يهجم باقتصاد الدول سابيهه – امبيس بالخلگ وامحومر اعيونه

يزرع بالرعب والخوف هد الناس – نتراجف رجف يكرونه ملعونه

***

نأمل هالسنه : (الواحد اوعشرين) – منهه هالنريد اونطلب العونه

ادخيلچ يا سنه يا عيني خلصينه – امن الجونه لـِفـْـو كتلونه باگونه

جيثوم اعله صدرالناس موتونه – خنگونه خنگ بالسوگ باعونه

احترفوه الچذب والقتل ، دمرونه – عقدين الزمن والوطن خسرونه

***

يا سنة الجديده اشويه رحمينه – من ذوله الرعاع ابقصد ذلونه

واحدهم كرش واملوغد الخدين – تسليب اونهب وابلادي مرهونه

وافلوس العراق اتفرهدت فرهود – والجاره تعيش اعله اليحـَـولونه

واعراق المجد صاير خرابه اليوم – (حـَمـُرابي) الكتب حـِرْگـَوْ ابقانونه

***

كتلوا بالشباب الفقره بالساحات – وابكل وقاحه اليوم فجرونه

*(بلاسخارت ) مرتشيه تحمي الموت – يا هيئة امم ليوين تنسونه

يادم الشباب الصار چن نهران – والعالم سكت للموت باعونه

يا شعب العراق المحد ابحالك – ما كو كل عدل چا وين وصلونه

رحتي ياسنة عشرين يا شينه – والبعد اليجي ماندري مضمونه

---------------------

*جينين هينيس بلاسخارت:- مهنتها في الأمم المتحدة

في أغسطس 2018 ، عين الأمين العام للأمم المتحدة أنطونيو غوتيريس ، هينيس بلاسيرت ممثلا خاصا له في العراق ورئيس بعثة الأمم المتحدة لمساعدة العراق (يونامي)

--------------

ســــــتوكهولم

22/كانون الثاني

عنوان البريد الإلكتروني هذا محمي من روبوتات السبام. يجب عليك تفعيل الجافاسكربت لرؤيته.