كـتـاب ألموقع

حِكَمْ الحاج (وجدان)) في ديوان (مردان).. (ذيل الحصان) (1)// حميد الحريزي

• 

تقييم المستخدم:  / 0

سيئجيد 

المجموعة: حميد ألحريزي

تم إنشاءه بتاريخ الأحد, 17 كانون2/يناير 2016 17:07

كتب بواسطة: حميد الحريزي

الزيارات: 1804

الموقع الفرعي للكاتب

حِكَمْ الحاج (وجدان)) في ديوان (مردان).. (ذيل الحصان) (1)

حميد الحريزي

اقبل الحاج (وجدان) كعادته الى الديوان، ليرتشف القهوة في مضيف الحاج مردان ، وليتداول الحديث مع ابناء قريته في شؤون الانسان ......

السلام عليكم .....

نهض جميع من في الديوان لاستقبال الحاج (وجدان) مهللين مرحبين بقدومه  الذي يترقبونه كل يوم بلهفة كبيرة، اخذ مجلسه كعادته بجانب الحاج مردان ......

صباح الخير حجي

صبحكم الله بالخير والامان جميعا رحم الله والديكم ... اخذ فنجان القهوة  من يد  الكهوجي، زاده بواحد اخر

احسنت خدمناك عريس .....

ممنون حجي والف عافيه، هني ومري انشاء الله

اخرج حجي وجدان مسبحته من جيب سترته، واخذ يدعك حباتها بين كفيه وقد طاف ببصره مستعرضا وجوه الحاضرين وكانه يحثهم على الطلب منه بالحديث  منتظرين  جديده كما هي عادته  في كل يوم

-أي حجي وجدان اشوف عندك سالفه تريد تسولفه، هاي الزلم كله مستنبطه  تريد تسمع  ...

أي والله  حكيمنه بروح والديك انته ابو الحكمه وعودتنه على حجاياتك الحلوه  .... هكذا نطق جميع الجالسين بصوت واحد مؤيدين قول الحاج مردان

تنحنح الحجي وقد أخذ نفس قوي من جكَارته ....  وقال :-

اليوم اني عندي سؤال واريد جوابه  ....

تفضل  حجي النعرفه نكَوله وانته ابو المفهوميه

السؤال :-

ليش الحصان يموت من يبترون ذيله ؟؟؟

سرت الهمهمات بين الحضور، بين مستغرب وبين مستفهم، يرى ان الحكيم اليوم  مو عله بعضه !!!!

حجي وجدان احنه نعم نعرف كلنه بتر ذيل الحصان تكتل الحصان سبحان الله لكن ليش ماندري....

انبرى الحاج مردان  للإجابة  قائلا :-

حسب معرفتي ان سنسول الحصان ممتد الى ذيله، واذا كطعنه الذيل انكطع  السنسول يلي ممتد بيه الحبل الشوكي، واذا انكطع هذا الحبل يموت الحيوان ... صح لو موصح ؟؟؟

نعم  حجي مردان صح ونص وخمسه ....هههه

ضحك الجميع  وقد كانوا مسرورين لاجابة حجي مردان وانقاذهم من الاحراج ...

لكن حكيمنه شنو قصدك بهل السؤال، انته ما تنشد هجي نشده اله عندك هدف، خو ما جاي تمتحنه …….

والله يابه انتم اكبر من الامتحان وكلكم مفهوميه، لكن هل التشوفون الوادم  تتظاهر وتهوس ضد الحكام الظلمه وضد الارهابيين ومن ضمنهم الدواعش واطرافهم وحواشيهم، وليش امريكا التندعي بالديمقراطية والسلام والحرية والرفاه للشعوب ما تسقط هاي الحكومات الظالمة وما تقضي عله داعش  وحواشيه ؟؟؟؟

عمي تره هاي امريكا وربعه مثل الحصان، وهذوله الحكام الظلمه والدواعش  والارهابيين ذيله، واذا انكطع ذيله تموت ....

وامريكا ما تريد اتموت بالتأكيد ... صح لو موصح

والله حجي كلامك صح ونص وخمسه ... يبين هاي الوادم تخوط بصف  الاستكان

رحم الله والديكم ... بس عمي الوادم قسم ما تعرف وما تريد تتعلم، وقسم   هذا  الحال خادمهم من حيث اهمه شعرات مجلبه بذيل الحصان .....

هكذا حتم (وجدان) حديثه مادا يده  للكهوجي  قائلا :-

شو اطني بويه فنجان كهوة رحمه على والديك والف نعله عله ابو الحصان  وابو ذيله .

حميد الحريزي

• < السابق
• التالي >