كـتـاب ألموقع

حكايــا العم (وجدان) في ديوان الحاج (مردان) ح6// حميد الحريــــزي

• 

تقييم المستخدم:  / 0

سيئجيد 

المجموعة: حميد ألحريزي

تم إنشاءه بتاريخ الثلاثاء, 16 شباط/فبراير 2016 16:16

كتب بواسطة: حميد الحريــــزي

الزيارات: 1779

الموقع الفرعي للكاتب

حكايــا العم (وجدان) في ديوان  الحاج (مردان) ح6

أغتيال (فلنتاين)......

حميد الحريــــزي

بعد اليوم الثقيل الذي عاشه جلاس ديوان الحاج (مردان) بسبب عدم حضور العم (وجدان) يوم الاحد 14-2، هل عليهم وجدان وتضاريس جبينه ولمعان عيونه  وحركة شفافه تدل على انه يحمل في جعبته اليوم امرا أزعجه او على الاقل  جذب اهتمامه  بشكل  غير اعتيادي .....

بعد صبحة الحضور بالخير وارتشف فنجان القهوة المعطرة من يد القهوجي .... بادر بالقول :-

بغير ماتسألون اني اعرف انتم تريدون تعرفون ليش اني امس ما اجيت للديوان ... مو لو مو مو ؟؟؟

نطق الجمع:-

أي والله عمي وجدان حقيقة انشغل بالنه عليك وعله سبب غيابك عنه، والله الك  وحشه جبيره  ولا يهون حجي مردان والجماعه الحضور ولكن مثل مايﮔول   الحجي (وجدان ملح الديوان).

رحم الله والديكم والله انه يعز عليه حتى لو ساعه ما اشوفكم، شلون يوم كامل ... لكن للضرورة احكام مثل مايكولون ....

المهم امس الحجيه مرتي كايلله ابن ابنه .... حبوبه اليوم الوادم راح توزع ورد احمر وجكليت بشارع يسمونه شارع الجواهري (الروان)، الصديج لصديجه والولد  لمه، والحبيب لحبيبته، والزوج لزوجته، يسمونه (عيد الحب)، ﮁاحبوبه انتي ليش  ما ياخذج جدي ويطيج  ورده حمره، وتشوفين الوادم الفرحانه بهذا اليوم ...

وما احس اله ام الويلاد الا ذبت الاسود ولبست ثوبه الحمر الجديد وكحلت عيونه  الحلوه.... ودكة رجل الا تروح وتشوف وتفرح ويه الشباب وتتذكر ايام فرح الشباب والعشك ايام الجوبي والركص الحلو وصوت (المطبﮔ) الحلو ايام الدخول .... وتدرون انه  ما اكدر اكسر بخاطره عزيزة كلبي ....

كول ركبنه ورحنه للولايه وبالخصوص  لشارع ((الروان)).....

لكن المصيبه من وصلنه اشو ما لكينه فرح، اشو لطم وصياح وطبخ والوادم لابسه اسود ...!!!!!؟؟؟؟

ولكم شنهي هاي يصير مات هذا التسمونه ((فلنتاين)) وحنه ما ندري وانتم ناصبيله عزه ؟؟؟

عمي جان جبت وياي عمامي وقرينه الفاتحه لروح المرحوم، وجان الحجيه   جابت وياه خواته وملتهن وياهن ويعزن نسوان المرحوم ......

والغريبه الرجال يبين مو ميت موت الله لا بل مجتول، لان جانت الشرطه دار ما داير اللطامه والمعزين، وجن خايفين عليهم، مدري خايفين منهم ؟؟؟؟

افتركت لمرتي .... ها يم سعيد يبين (اجت اليتمه تفرح ما لكتله مطرح) مثل  مايكولون اخوتنه المصريين، وبعرس اليتيمه غاب الكمر، وجن الفرح ما يوكعنه، وهل عمينه عله الرجال وموتناه مدري من كتله وصبغ لونه الاحمر بالاسود؟؟

ابو سعيد ما تنشد الوادم وتشوف شنهو القضيه؟؟؟ خاف احنه تيهنه؟؟

والله فكره.... نشدتلي واحد من اللطامه ... عمي شنهي القضيه عمي ما تكلي  شصاير؟؟؟

شنهو عمي شصاير ... هاي وادم بطرانه تريد تسوينه مثل الغرب اهل الكفر، شنهو حب شنهو ورد شنهو فرح، هاي حرام وضد الدين ... عمي تروح اكلك ماعون قيمه واشربلك استكان جاي واخذلك دمعه وروح لهلك، خاف هم جاي ابو المعيد تدور عيد الحب؟؟؟؟

-    عمي جاش شنهو الله والدين مايريدون الفرح، ومايريدون الحب، الله ما يحب غير اللطم والبواجي والنواعي؟؟؟

والله يعمي انتم عميتوا على الدين واهل الدين الصدﮔ وراح اتخلون الوادم تطلع  عن طوره، وتخسر الدنيه والدين ....

جرتني ام (سعيد) .. خاله امشي هجي حب ما يراد امشي نرد لهنه ... لايسمعونك ويروحون يفشخونك جتالت هذا الفلنتاين ... بس المحيرني يبو سعيد  ما طول  كتلوا  الرجال  جاعليمن يلطمون ؟؟؟

يالله يالله حبيبتي امشي لكن ما نرد اله اشتريلج دبدوب احمر وباكة ورد حمره  وموبس هاي راح اشتريلج قلم حمره جديد ونجدد عرسنه ونفرح ونحب غصبن اعله  المايرضه، وراح اخذ لكل البنات والويلاد جفافي حمر وريحه طيبه وملبس وجكليت ... وخلي قيمتهم الهم ...

مد وجدان ايده الجيبه وطلع صمه متروس جكليت وملبس وكال للكهوجي عمي  وزعه اعله الجماعه ...

واطني وياك فنجان كهوة .....وهاك هاي حلقومه حمره او  ورده  حمره  وكل عام  وانتم  بحب  وسلام .... وخلوا  اللطم لأهل اللطم

حميد الحريــــزي

• < السابق
• التالي >