كـتـاب ألموقع

حكايا العم (وجـدان) في ديوان الحاج (مردان)// حميد الحريزي

• 

تقييم المستخدم:  / 0

سيئجيد 

المجموعة: حميد ألحريزي

تم إنشاءه بتاريخ الإثنين, 22 آب/أغسطس 2016 12:27

كتب بواسطة: حميد الحريزي

الزيارات: 2200

الموقع الفرعي للكاتب

حكايا العم (وجـدان) في ديوان الحاج (مردان)

حميد الحريزي

 اشرقت وجوه الجالسين في ديوان الحاج ((مردان)) حين لمحو من بعيد العم ((وجدان))  متوجها  الى المضيف، بعد غياب  طال انتظاره ...

ولكن سرعان ما اصابتهم الدهشة والاستغراب حينما شاهدوا العم  وجدلن حينما اقترب منهم خلع الكوفية والعقال ووضع على رأسه ((كاسكيته))، رغم انه يرتدي   صايه وعلى  ومسرسح على متونه  بشته الاسود  ......

حال وصوله باب الديوان ادار ظهره للباب واخذ يمشي عله البگ وهو يقول  وعليكم  السلام !!!!

يا الله هل جن العم ((وجدان))، وهل غيبته هذه قضاها في مستشفى المجانين  ونحن لانعلم ؟؟؟

نهض الحاج مردان وتقدم نحوه امسكه من اكتافه  وادار وجهه عليه  قائلا :-

هاي  شنو ((وجدان )) شبيك ياساتر، هاي  شمسوي بروحك، عمي انته رجال   عاقل  وعليك العتب، شنهو كاسكيته شنهو تمشي بالمكلوبي ؟؟؟؟؟

رفع وجدان عن اكتافه ايدي الحاج، ثم خطى عدة خطوات واخذ له مجلسا وسط  المضيف !!!!

ضج الديوان بالضحك ممزوجا بالحيرة والاستغراب .....

لا وااله يبين ((وجدان)) صاير بعقله شي، عمي هذا الزلمه اليوم يبين لاگف  ياساتر ....

يارب استرنه من هل العاقبة ... مع الاسف والله وجدان خوش زلمه وهو ابو الحكمه والعقل الثجيل هجي يصير بيه ؟؟؟

وضع مردان يده على جبهته معتصرا صدغيه بقوة وقد لفه الصمت للحظات ثم التفت للحضور قائلا :-

 ولأن وجدان ابو الحكمه والگل الثجيل لازم  نعرف  ليش يسوي هيچي ؟؟؟

((وجدان)) ابروح ابوح خلص شفنه السويته اليوم وانته ابو العقل، بس ابروح  ابوك   گوم اعدل روحك  والبس عگالك وشماغك وفهمنه شتريد اتگول ؟؟؟

نهض ((وجدان)) وهو يهز يده، مع حسرة مريرة، ونظرت استغراب وعتاب   للجالسين وبعد ان طلب ((طاسة))  ماي بارد، وشرب فنجانين قهوة من يد  القهوجي ((سعيد)) ، ملقما ((مشربه)) سيكارة  من  قوطيته  التراثية، حيث انه  رفض ان يدخن سكائر الباكيت ولازال يلف سكائره من ((تتن ابو الريحه))،  اشعلها بنار ((زناده)) الذي فاحت  منه رائحة البانزين .....  ثم توجه بسؤاله  للجميع :-

گلولي بروح  والديكم هم واحد منكم  مايشوف  تلفزيون ابيته كل يوم ؟؟؟

فاجاب الجميع :-  شنقضيه عمي وجدان منين اكو واحد بعد ماكو ابيته تلفزيون،  ومايشوف الفضائيات خصوصا واحنه طلايبنه معره، تظاهرات، وعرك،  وتفجيرات    ووو مصاب الله كله دايره  علينه ..

والله خوش حجي  .... أگول  اكو واحد منكم  يحمي ماي  بتموز ؟؟؟

عمي شنقضيه الوادم ادور البروده من ماي العروس،  والله  مفضل عليه يحط  ثلج  فوگ الماي  يالله  يغسل .

خوش حچي  منهو منكم يثرد نستله بالتشريب ؟؟؟؟

ضحك الجميع قائلين، عمي ليش احنه امحصلين الخبزه حتى ادور انغمس مرگ  بالنستله ؟؟؟؟

هاي شبيك عمي وجدان  اشو انته  راح  اتخبلنه  ؟؟؟

أي يبويه عود خافوا  تتخبلون اذا انتم بعدكم عقال !!!!

عمي  من يفزع واحدكم بعركه مو ينزع عگاله وشماغه  ويفزع امفرع ؟؟؟؟

أي عمي  وهاي  شنهو يرادله سؤال  .؟؟؟

زين چا منكونكم عقال،  واستغربتوا ليش انه لابس ((كاسكيته)) فوگ الصايه، وليش طبيت للديوان بالمگلوبي، وليش  ماگعدت ابمچاني، ليش ما تگولون  اتخبل   للابس العمامه فوگ المرقط ؟؟؟ وليش ما تگولون مخبل للمنصبينه وزير  للكهرباء وهو يگللكم طفو الگيزرات بتموز حتى لاتنگطع  عن بيوتكم الكهرباء، وليش تگعدون تحت منبر ابو عمامه اليگلكم عيشو ب((30)) الف دينار، ولا تثردون  نستله بالتشريب ؟؟؟

زين ماتگلون للنايب امش عدل ولا تمشي بالمگلوب مو انته التحاسب الشعب   الگعدك على كرسي البرلمان ، ولكن الشعب هو اليحاسبك ؟؟؟؟

ثم التفت  الى  حجي ((مردان))  مخلطبا  الجميع قائلا  :-

وهساه من هو اليضحك عله الاخر، وجدان يو انتم،  مو يگولون ((الناس على دين ملوكهم)) ، وهل تشوفون هذا دين وسلوك حكامنه ،يمشون بالمگلوب، ويحچون  بالا معقول،  ويسون الاسود ابيض  والابيض  اسود ؟؟؟؟

التفت الحاج ((مردان))  مخاطبا الحاضرين قائلا :-

مو گلتلكم ((وجدان))  مو مخبل  والله يعمي احنه الماعدنه  عگل  ومخابيل .

حميد الحريزي

• < السابق
• التالي >