كـتـاب ألموقع

قنّدَرّجي..!// زهير كاطع الحسيني

تقييم المستخدم:  / 0
سيئجيد 

زهير كاطع الحسيني

 

عرض صفحة الكاتب

قنّدَرّجي..!

زهير كاطع الحسيني

 

قنّدَرّجي بالدوله صِرِت

بإحدى إلشَرِكات

سَجلولي راتِب بالعجل

وسِحبولي دِسكات

بالحاسِبه إسمي إنكِتَب

ويّه إلِحدَيثات

وإعرفت أنواع الجِلد

وفصّلِت باشنات

وخيّطِت مِنه إشما  رِدت

وإلزكَت لزكَات

ماعندي بالمَصنع شُغل

غير إلِحبيبات

إلسَمره والبيضه سوّه

كلهن طَبيبات

لجروحي لو رِدت إلدِوه

هِمسَنلي هَمسات

وإنطني بالشيشه صَمغ

وضمنلي بوسات !

  *   *

قنّدَرّجي بالدوله صِرِت

والوكت فلتات

ما تدري مرتي بقصتي

تآخذها حَسرات

ومِن عِدها دا أسمع حَجي:

-    إشكَالن إلحِلوات ؟

-    وجا ليش عني إتأخرِت ؟

-    لو ردِت خوّ بات ؟!

كلّ يوم عِندي جَنجَرس

وإللغوّه ساعات

مِن (باتا) آني ما جِزِت

مو ذنبي هيهات !

  *   *

قنّدَرّجي بالدوله صِرِت

وإلبَسِت بَدلات

حَسبالي أتّعتّبَر بَعد

وأكسِب إلّي فات

طِلعتلي مَرتي إمعَطُبه

وشُمرتني شَمرات

كَالتلي إلمَن هلّ لِبس؟

ما كافي طلعات ؟

ما تدري ما يكفي دِخِن

أكل الحَمامات

إشغلّت بيهن مُهجتي

وإسهرِت حَفلات

ما أكَدر أتركهن بَعد

شوف إلمصَخمات!

  *   *

قنّدَرّجي بالدوله صِرِت

وبسماري إنجات

ثابت مِثل أنكَر سُفُن

وَسط المُحيطات

نَصّبت غيري وإصّعَدِت

وخيطِت رِكَعات

مَسؤولي يعرف مَوقعي

رَجل إلمُهمات

غَطيت عَنّه إشما أخذ

وإستَرِت عورات !

  *   *

قنّدَرّجي بالدوله صِرِت

وقيطاني لَفات

مَربوط مِن أول  وَكت

ويّه الوزارات

وإحبالي كلها إمدَندِله

كلّ شُغلي لِعبات

بأحزاب إسمي إمدَوّنه

وعِندي هويات

للجاي فاتح مَنزلي

وللصُبح كَعدات

عشرين شَغله كلها لي

بايع عَبايات

للساده أصحاب السِمو

شيوخ وبَهاوات

باصات عِندي إمصفطه

وأربع عمارات

وحُصه عِندي مِن إللَفط

بإحدى إلصِناعات

أجمَعها مِن وَكت إلوَكِت

وأرسل ْ حَوالات

غاسل أموالي بلنّدني

حُب الوَطن مات

ألعب وضايع مِحبَسي

فنّه إللكَه إلبات؟!

  *   *

قنّدرّجي بالدَوله صِرِت

وإيرادي صَفقات

إيفاد آني لو رِحِت

ينطوني شِيكات

والقايم بحَملة سَفر

ضامنلي سَفرات

آخذ  وما أنطي خَبر

إمخليها سَكتات

ولو صار بالحاله نَدِس

أعرِض مَلفات

ألّصُم بيها  كُل  وكح

وأغلق حِسابات

  *   *

قنّدَرّجي بالدوله صِرِت

ما أنطي لزمات

آخذ وأنطي مِن إلربح

مِن إلشاكَه باكَات

مَشروع لو صار العَقِد

عندي جماعات

كِلمَن عارِف نِسبِته

والقَبُض شَدات!

  *   *

قنّدَرّجي بالدوله صِرِت

عَيّنِت بويات

أولاد عَمي وخالتي

وكِلمَن إجه وفات

إفلوس دا أكرف كـَرف

دا لِمها صَمدات

وإلباقي صايغها ذَهَب

باون وليرات

مَسؤول بالدَوّله صِرِت

لا تِحجي وَك شاة !

  *   *

مَسؤول بالدَوّله صِرِت

عِندي وِفه وذات!

دا أنطي للعَامِل خُبز

وإشويّه بُصلات!

ولو رِدِت أكَطع خُبزِته

ما تهِمني هوسات

مَسنود وعِندي ظَهَر

نوابي مِيات

مَتخومه ما تدري إلجِره

بالشَعَب هلّ مات!

قنّدَرّجي بالدَوله صِرِت

بأرقى إلعِصابات !!

 

زهير كاطع الحسيني