كـتـاب ألموقع
تراتيل فَضوة عرَب// زهير كاطع الحسيني
/ 0
- المجموعة: زهير كاطع الحسيني
- تم إنشاءه بتاريخ الثلاثاء, 05 أيار 2020 19:22
- كتب بواسطة: زهير كاطع الحسيني
- الزيارات: 2311
زهير كاطع الحسيني
تراتيل فَضوة عرَب
زهير كاطع الحسيني
ترتيل 1
بَس كون يآخذني الطرَب
وآخذ إدروبج بغداد
أنزل على سوك (السِنك)
وأعبر على (فضوة عرب)
مشتاك إلج (كَهوة شُكر)
مشتاك أشوف (الأرمن)
وأركض ركض وأدبج دبج
أبيوت ما تتأمن
وكَعن شناشيل العكَد
وكَعن إسكَوف الحصران
إلهن عُمر كلشي إنتهى
يا محلى ذاك البنيان !
.......
بس كون يآخذني الطرب
وأنزل على (الميزره)
أعبر على (باب الشيخ)
وآخذ سياج المكَبره
شفت الغزالي نايم
وإلكَيت حفنة شيّاب
إسألت .. هذي بغداد ؟!
أرض الملوك الأفذاذ ؟!
كَالولي ما ظن إوصلت
تاهت عليك الأوصاف
بغداد من ذاك الزمن
ما بقت بيها أعراف
إسأل على (قنبر علي)
و(الفضل) و(أبو سيفين)
بغداد كبرت مِن وكت
والنهر كَصها صوبين
لا أدوخ يا إبن العرب
بغداد كاتلها الطرب !
.......
غناها (ملآ عبود)
بغداد مبنيّه بـ تمر
وصللو إلـ يمّها الهنود
فلّش وأكل خستاوي
يآبه يا بو عيون السود
إتغنت ْ بـ (يوسف عمر)
(عباس جميل) و (داوود)
غنتها لبنان ومصر
وعبر غِناها الحدود
ولو ردت إسأل (فيروز)
بغداد أحلى موال
إتغيّرت عليها الأحوال
ولو كان عندي رجلين
أنزل على (بوب الشام)
وأتعنّه لـ (الداودي)
واكَع حِمِل الحَمال
.......
ترتيل 2
بس كون ياخذني الطرب
وأنزل على باب الأغا
بغداد خوش إولايه
سواها (مَدحت) مفخره
لِبست الحلوه نفنوف
ولِبس الأفندي الصايه
محروسه إبجاه النبي
كَالوا عليها آيّه
الله يخلي صبري
قائم مقام (المنصور)
بغداد مَحميه بـ وصيّ
قلعة صمود الأحرار
مُصلحها (مدحت باشا)
سَلمّها بيد الأخيار !
.......
ولو كان عندي كيتار
غنيت داير ما يدور
بغداد نسوان وزلِم
خلّو حَطب بالتنور
شعلوها مِن صوب الترك
طَبّ إنكَليز الباسفور
بالتالي مِن ضاك الوكت
حِصروهم حَصرة إجلاب
(شعلان) بـ رميثه طفر
وسَدد عليهم الأبواب
العشرين صارت مَرجله
إنطت دَرس للأجناب
بس كون يآخذني الطرب
آخذ قلم وي قرطاس
وأكتب عبارات النصر
محروسه تبقى بغداد
.......
وأرجع على (سيد علي)
يختملي بالزنّامه
ويكتبلي فوكَاها إقبلت
وإرضيت بـ (أم خزآمه)
خلتني أبقى للصبح
طول الليل ما نامه
بَس كون يآخذني الطرب
أنزل على فضوة عرب
آخذ عروس إمكبّعه
أخلاقها حِشمه وأدب
يا ربي هذي بغداد
يا وسفه عَ الباك ونهَب
إحنه أهلها الأخيار
شامِخ نخيلك يا رطب
عِرسان زَفينه بَعد
مِن اليَمن جووي ومِن حلَب
ما تدري بالدوله شكو
كم نائب إبليّه عجب
إتربع على كرسي الحُكم
مِن دون حُجّه ولا سبب
صيّح علينه وإنجلَب
بغداد تدري بحالتي
باكَوها ثروات الشَعب
ساسات عِدنه ما أستحت
خلتنه إبثوره وغضب !
.......
بَس كون يسمحلي الوكت
أنزل على فضوة عرب
آخذلي كم سايق شَفل
وأهدم براثين النَمل
ما خلي جدران الوطن
مَنخوره يآكلها الجَرَب
حَشّم يا قايد صُحبتك
وأخلعها أحزاب وكتّل
هاي الضماير نايمه
ما تسوه فضوه مِن العتب !
زهير كاطع الحسيني
المتواجون الان
726 زائر، ولايوجد أعضاء داخل الموقع
