الحمد لله !!!!!!// شعر: حامد كعيد الجبوري

اقرا ايضا للكاتب

الحمد لله !!!!!!

حامد كعيد الجبوري

يا مكان ...؟؟

أبيا مكان ؟؟

باجر التفجير يوصل يا مكان ؟؟

يا هو مات ؟؟

ويا هو عاش ؟؟

الحمد لله ..

اليوم كملت النهار

الشكر لله ..

اليوم كملت النهار

وباجر يحلها ....

أيضيف يوم العمر

....ساعات احتضار

الحمد لله ...

نهر سوينه الدموع

دموع نبجي عالشهيد

دموع نبجي عالجريح

والوطن ساحة دمار

الحمد لله !!!

بعد جم محبس بصبعك ؟؟

صيح بات ..

الورد يابس بالشجر

العيون أتصب نفط

كلشي أسود

والسياسة أتخم محار

الحمد لله الانتخاب

وصار عدنه البرلمان

مو مثل ذاك العتيك

الشعب بيده الاختيار

الولاية الأولى مذبوح الوطن

الثانية صارت سوالف

الثالثة بصمة وقار

الموت عالبيبان واكف

ما يفرق يشتغل بسم ألآله

ولا يهمه

يلكط زغار وكبار

الحمد لله اليوم عزراين شفته

بالوطن ناوي أقامه

القادسية الأولى خلصت ...

( يا كاع ترابج كافوري ) ..

وخلفت جيش الأرامل ...

واليتامى تترس عكود الولاية

وللشهادة ...أبنينه حي الشهداء

أحياء للأسرى ..ومجهول الهويه ...

القادسية الثانية ..

أكلت حدود الولاية

والشهيد يشيل وياه الشهيد

أنترست الدنيه مكابر

الحمد لله مات جيراني وصديقي

الحمد لله مات أبن عمي وأخويه

الحمد لله لسه أتنفس بريتي

والنفس ...

نار وشرار

الحمد لله ...

بالوطن يحجي السياسي

وعالوطن تبجي الكراسي

والوطن بيت الأجار

***********