كش ملك كش الوزير// شعر: حامد كعيد الجبوري
- تم إنشاءه بتاريخ الإثنين, 14 تموز/يوليو 2014 11:54
- كتب بواسطة: حامد كعيد الجبوري
- الزيارات: 1642
كش ملك كش الوزير
حامد كعيد الجبوري
كش ملك ...
وأخذ الوزير
خلي نتقاسم غنايم ...
يا وزارة تريد أخذها
شرط تنطيني التجارة والنقل ...
بالتجارة أنحقق أحلام الكبار
وبالنقل ...
لازم أنعين الفقير
أنشيله فوك ظهورنه الآخر محطه .........
للجحيم وللسعير
ولا تبيع أصواتنه بسوك الهرج
ردلي صوتي ...
أنتو تجار السياسة
وما تعرفون الذمم ...
وأحنه فقره ....
الفقير يبيع كلشي....
راسه عالي ...
وغيم ميغطي القمم
يبيع مسحاته وعباته
يبيع طابوكه عتيكه
يبيع دشداشة عرس
يبيع كلشي ......
وما يبيع ...
الكاع، تاريخ الرجولة
الذمه ، مكواره
وغناوينه أمس
أحنه فقره ...
بينه شارات وعلامه
ومن نسولف ...
تستحي تغار الشمس
النخل بيه ريحة شهيد ..
الكصب بيه ريحة شهيد ..
الكاع هلهولة شهادة ....
كش ملك كش الوزير ........
كش كراسي السود
من دم الفقير
أحنه فقره أفراشنه...
دوشك حصير ....
فراشنه.... دوشك حصير
***************
14 / 7 / 2014 م
المتواجون الان
866 زائر، ولايوجد أعضاء داخل الموقع