اخر الاخبار:
توضيح من مالية كوردستان حول مشروع (حسابي) - الأربعاء, 27 آذار/مارس 2024 19:18
  • Font size:
  • Decrease
  • Reset
  • Increase

ألمن نوجه العتب// شعر: حامد كعيد الجبوري

اقرأ ايضا للكاتب

ألمن نوجه العتب

حامد كعيد الجبوري

 

لمناسبة شهادة أمير المؤمنين علي بن أبي طالب عليه السلام

 

موال

----

ألمن نوجه العتب والفرج  سده العلي

بسمك علي جلبوا وزوراً بأسمك علي

باطل نهج سيرتك وداس أبصلافه علي

                أبدم البشر يا (علي)  يبني الوطن ساسه

                مهره وحسبنه اله وبكل درب ساسه

                أضمن صلاح الوطن لو  تنصح الساسه

مظلوم هذا الشعب وخصم السياسي علي

                   -----------------

مابين ( الصميده ) والرصيف أسرار..

                     عميقه وأمتلك برهان للفكره

الرصيف أيلم يتامه وأرمله وجوعان..

                      و(علي ) كبته ملاذ وتحضن الفقره

                  ---------------- 

لا تكتب قصيدة وتنتقد مسئول..

                       القصايد للمدح مو للشتم تكتب

وإذا أتعرفه حرامي كول أنظف أيد..

                      وهم شايف سياسي أيسلب وينهب

وإذا يبني قصر من دمعة الأيتام ..

                     الفقره أتبرعتله وعالدمع يركب

وأبد لتظن  يحرمك كهرباء أبيوم..

                    من حرصه علينه أيخاف نتكهرب

وجريمه الحصه ينطي وبالرجل تنداس..

                   وحرام أتخيس عدنه وبالزبل تنذب

( حيدر ) مو سياسي وباك حب الناس..

                   ولأن باك الكلوب أتشرعنت ينسب

ولأن ربك حجبها الدعوة المظلوم..

                      جار الظالم بأحكامه وأستجلب

               --------------- 

المؤمن من جحر ما يلدغ مرتين..

                            سفينتكم خراب وما بعد نركب

سود أوجوهكم بيّض أوجوه هواي..

                            غسلتوا للزنيم العار والأجرب

ما نكدر نقارن بالأمس واليوم..

                            البانيه  الشعب بيديكم أتخرب

كراسيهم خشب وأمريكه أرضتها..

                      طيحت جم عرش بيه حاكمه جلب

يتهدم الكرسي المنبني أبلا ساس..

                          ودمعات اليتامه أمن الجمر ألهب

يرتج العرش من دمعة الأيتام..

                        وعلى أدموع اليتامى الكون ما يحجب

حيدر ما ملك كرسي الخشب هيهات..

                           كلب فوك الكلوب وعرشه يتنصب

                    -------------

 

دخيلك يا علي طاحت كصص للكاع

                              ومد أيد الرذيله الجائر وأذنب

يستر عالحرامي أيهادن القاتل..                            

                             السيوف أيحدها بينه وللخصم أرنب

تعلمنه الكفخ من كثرة الجويات..

                            دامنه المذله وبيه نتلقب

تتخورس زلمنه الكثرة الطكات..

                            لامومن حجه ولا ثاير أتوثب

ولا صاحب بخت ويصيح بينه الله..

                          ولا تصحى الضماير لا كلب يشغب

دخيلك يا علي ما تحضر الشدات..

                            ياهو الينتخي ويا كرسي يتعتب

مقفول الفرج وأنسدت البيبان..

                            طحنه أبغيرتك ما غيرك أمنتب

دخيلك يا علي (ألمن بعد مذخور)..

                           معسره وطحنه بيها والطفل شيّب

سيفك يا علي المنذور للإسلام..

                          حفاظ الشريعه وباني  للمذهب

 

--------

للاتصال بالموقع

عنوان البريد الإلكتروني هذا محمي من روبوتات السبام. يجب عليك تفعيل الجافاسكربت لرؤيته.

عنوان البريد الإلكتروني هذا محمي من روبوتات السبام. يجب عليك تفعيل الجافاسكربت لرؤيته.

عنوان البريد الإلكتروني هذا محمي من روبوتات السبام. يجب عليك تفعيل الجافاسكربت لرؤيته.