اخر الاخبار:
توضيح من مالية كوردستان حول مشروع (حسابي) - الأربعاء, 27 آذار/مارس 2024 19:18
  • Font size:
  • Decrease
  • Reset
  • Increase

سالوفه عجايز والعاقل يفتهم // حامد كعيد الجبوري

اقرأ ايضا للكاتب

إضاءة

سالوفه عجايز والعاقل يفتهم

حامد كعيد الجبوري

 

     جان ياما جان في قديم الزمان أكو 3 خوان، كل واحد ساكن ديره وبيناتهم زيارات وطلعات وسفرات، وجان ابوهم الحاكم ظالم وحرامي كلب ابن كلب ويذبح عالشبهه، بس ضابط الأمور وكلها تخاف من سيفه وميطير طير بضبابه، المهم الحاكم مات وبقت اﻻمور فلتانه وراه، واحد من ذوله الخوان ميعرف يشتغل بس حرامي وترس جيوبه بمال الحرام، اﻻخو الثاني اشتغل سلاب وذباح  ويذبح عامي شامي كلمن يفوت من يمه، اﻻخو الثالث عطال بطال ﻻ شغل وﻻ عمل لأن الكاع الكاعد بيها كلشي موجود، مي وفواكه وزراعه وجبال وكلشي وكلاشي بيها ، وأستمر الحال وكلمن يهادد على أخوه، فد يوم اشتهت مرت اﻻخو العطال بطال أتشوف أخوة رجلهه وكرايبها شلون عايشين شلون مدبرين أمرهم، ويجوز أستغفر الله رجلها دزها على أخوته عنده غايه بيها، المهم أجت وصارت جيتها يم الذباح ومرت من يمه وسلمت عليه، الرجال يا غافلين ألكم الله بس شافها سلم عليها وسألها عن أخوه وشلون عايش وعزمها أبيته، ومن أتعذرت وما قبلت تتأخر كلها الله وياج مرت اخويه سلميلي على اخويه وعلى ويلاده، ونفس الشي مرت على  اﻻخو الحرامي وسلمت عليه وسلم عليها وما قبلت يعزمها وتتعطل على رجلها وينشغل باله عليها، من رجعت الحرمه لرجلها سولفتله عن كرم اخوته وشلون عايشين من وره البوك ومن وره الذبح والتسليب ومنشنشين بمال الحرام  اشو رجلها  ﻻ محزوز وﻻ ملزوز جر خنجرك واكتل مرتك وصاح ألله واكبر اخوتي باكو فلوسي وفلوس مرتي والنوب رجعتلي حامل، صاحت العشاير على أخوته وكالت عمرنه ما سمعنه هيج اخوة يسوون بخوهم هيج فاينه من عمت عينكم على هاي الدكه الرديه، وفوكاهه العشاير فرضو عليهم فصل (ضريبة) على ساينة العشاير، وحشه كدركم اﻻخو الحرامي دفع كل الفلوس البايكها وما كفت، وقسطت شيوخ العشاير دين بركبته يدفعه كل راس شهر، ونفس الشي ويه اﻻخو الذباح السلاب ، وما أطولها عليكم اﻻخو الثالث ذكي وداهيه وفطن فرهد مال اخوته وحط رجل على رجل وكام يضحك على أخوته القشامر تعرفون ليش؟ اني اكلكم ليش، ﻻن ذوله اﻻخوة كل مالهم اللي ورثوه حرام جمعه الحاكم الظالم أبوهم من دم الفقره ، وأكيدن مترجع خوتهم مثل كبل اﻻ يفكرون شلون يرجعون للفقره حقهم ، ويخلصون ركابهم من فريضة العشاير  ، وتعيشون وتسلمون ،

 

 للإضاءة ............ فقط 

للاتصال بالموقع

عنوان البريد الإلكتروني هذا محمي من روبوتات السبام. يجب عليك تفعيل الجافاسكربت لرؤيته.

عنوان البريد الإلكتروني هذا محمي من روبوتات السبام. يجب عليك تفعيل الجافاسكربت لرؤيته.

عنوان البريد الإلكتروني هذا محمي من روبوتات السبام. يجب عليك تفعيل الجافاسكربت لرؤيته.