صار الوطن الهم غنايم// ثامر ياقو يدكو

• 

تقييم المستخدم:  / 1

سيئجيد 

تم إنشاءه بتاريخ الأحد, 19 كانون2/يناير 2014 17:30

كتب بواسطة: ثامر ياقو يدكو

الزيارات: 2793

صار الوطن الهم غنايم

ثامر ياقو يدكو

اسولفلك عن بغداد وانا الي بالكَلب غصه

نص كَلبي بقى هناك وبالغربه بعد نصه

والمحتل خنجره المسموم بكَلب بغداد رصه

وحكامنا ورثت وطنا وكل من اخذ حصه

صار الوطن الهم غنايم

والمكَرود ابيت التنك نايم

تركونه ونسونه وعاشو بقصور عاجيه

للجيران باعو وطنا وقبضو ميه بالميه

اكلهم لبن عصفور وشربهم مي معدنيه

وملايين بالقمامه تدور بلكت لكَمه مرميه

صار الوطن الهم غنايم

والمكَرود ابيت التنك نايم

يتنافسون بطلعتهم على التلفزيون والصحافه

ومن يحجي تكَول شكَد حكيم وكله حصافه

مثل المشاهير قاط ورباط معقم وينكَط نظافه

ومن تشوف شغله تكَول راح صوتي يا حسافه

صار الوطن الهم غنايم

والمكَرود ابيت التنك نايم

لا غيره عدهم ظلت بعد لا ذات ابد لا احساس

كل يوم تفجير وقتل وما ينعرف راس من راس

بالمصفحات يمشون ودايرهم افواج جنود حراس

ليش الخوف لو جان صدكَ انتخبتهم هاي الناس

صار الوطن الهم غنايم

والمكَرود ابيت التنك نايم

كل يوم يحلفون ويوعدونه بتحسين مي وكهربه

وبس تمشي عنهم الصحافه واحدهم يصير عكَربه

بعقود وصفقات وهميه يبوكَنه بخبث يحقق مأربه

يترس جيوبه وملايين لعمان ودبي واوروبا مهربه

صار الوطن الهم غنايم

والمكَرود ابيت التنك نايم

بغداد يل جنتي تزهين ودوم للدنيا ياسمين وعروسه

ضنينا بحضره وكنيسه وجامع وبحب الناس محروسه

ثاري ياهو اليجيج يطلع خوان ينخر بيج نخر سوسه

ما تهمه هاي الناس كل همه شلون يبوكَ ويزيد فلوسه

صار الوطن الهم غنايم

والمكَرود ابيت التنك نايم

• < السابق
• التالي >