قصيدة بمناسبة قرار تعدد الزوجات
الذي اقر, والذي سينهي مشاكل العراق, انشاء الله!!
عباس طريم
اشمال البرلمان ايدك عله الضره
ايريد ايبربد اعيالي , دهر فره
__
عباس طريم
اريزونا
__
ما عدهم شغل ردوا عله النسوان
وكالو ياشعب , حك الرجل اثنان
أول ما سمع , زين حفر خشان
وظل بالسوك لازك , من فلك طره
+ + +
من يوم السمعهم خيه ظل ايحوس
مو خشان جنه , اتكول جن طاووس
يباوع بالمرايه ويظل بيهه يبوس
ويمشط كرعته اتكول الف مره .
+ + +
خيه الزلم .. كلهم طلعوا امبدلين
جن نسوانهم ميتات , من اسنين
من سمعوا مثنى, الكل هتف امين
يوم العيد , يوم انعيده الكره
+ + +
من سمعوا يخيه , صاحت الصيحه
وطلع خشان يركض , طاح بالجيحه
انشك قاطه وقميصه, الحط عليه ريحه
واجاه عبود , من ماي الوسخ جره
+ + +
خيه ارجالنه , للحفل متحزمين
وايكولون : موش احنه, يكول الدين!
نتزوج ثلاثه , وعالاقل اثنين
شمالج يم زبون وخلف , محتره .
+ + +
يهل البرلمان , اشلون تتهنون
لو عرس امناتي وثنه , بيه اشلون
وياكم حاطه , اسباهي اوبخت حنون
يخلي اعبادي , يشحتكم شحت بره
+ + +
طركاعه واجتنه , اشلون يعليه ؟
ابوج ايريد يتزوج مره , اعليه
انجان انه يتيمه , وصدك علويه
يبربد هالقرار , ويعمي القره
+ + +
جانت غافيه ويه الحجي وانويمه
ومن سمعت زواج ,انصرعت اكريمه
ولن فوك السطح حجيهه وسليمه
موقعين الزواج , ومنتهي امره.
+ + +
ام شلتاغ صاحت , خاله شنهيه
خل نهجم عليهم هجمه بريه
وليعرس علينه , اوروح دبيه
انشحته امن المجر , لحدود سامره