قاريء مَقاييس..!// زهير كاطع الحسيني

• 

تقييم المستخدم:  / 0

سيئجيد 

تم إنشاءه بتاريخ الأربعاء, 28 حزيران/يونيو 2017 10:41

كتب بواسطة: زهير كاطع الحسيني

الزيارات: 2571

الموقع الفرعي للكاتب

قاريء مَقاييس..!

زهير كاطع الحسيني

قاريء مَقاييس إطلَبِت

إبغداد أتعيّن ْ

رايد قِراءه لِلبَلَد

وكلّ فُرصه أتحَيّن ْ

دا شُوف عَداد الوَكِت

أرقامَه إلـّتَمّن ْ

بليارهُم سَد إلدَخَل

إلمليار ما أسمَن ْ !

كلّ نائب إمخَطِط إلّه

دا  يآخذ الأحسَن ْ

قاريء مَقاييس إطلَبت

بالمَجلِس أتعَيّن ْ !

  *   *

مِقياسي بي آخر رَقم

إستثمار ببلادي

إلكَيت أخطاء إلصَرف

وإلّطَمِت حَدادي

أرقام ما بيها صُدك

كلّ واحد  إبوادي

إلفلوس للنائب صُفَت

حُراس وإمجادي!

ونثريه لأم إللِبَن

للشالِعه أفادي

راتبها خو ترس ألصَحَن

وإتبوك مِن زادي

مِقياسي ما يخطأ أبد

لو عُبَر لِيغادي

يقره تره حتى الجِذِب

ما يدري إلِعبادي !

  *   *

قاريء مَقاييس وصِرِت

بأكبر وزارات ْ

وشفِت أنواع إللَغُف

لأهل إلحِمايات ْ

مَشروع مِن تالي وَكِت

حِسبوله مِيات ْ

عُمّال ما عِدها شُغل

بَس بالهَويات ْ

مَشروع وَهمي إبلا  أثَر

عن واقِعه مَات ْ

صِرفوله فَد عَشرة سِلَف

ورسموله ذَرعات ْ

مِقياسي ما يخطأ أبَد

يقره إلمُهمات ْ !

  *   *

قاريء مَقاييس إوصَلِت

عِندي إعتراضات ْ

صاحِب مَعالي إشوَصّله

أحجِيها مَا تبات ْ

تلاثين عُمره إشّوزّره

ياهو إجَه وفات ْ ؟!

خِبرات ماكو بالبَلَد ؟

لو تبقى صَفقات ْ ؟

لو هي مَحسوبه إلزِلِم

إمكَدريها عَل ّ جارت ْ ؟!

  *   *

قاريء مَقاييس إورِدِت

أقطَع قوائِم ْ

خَلّوني أدكَلّب تَعَب

لا  لَّيلي نايم ْ

أرقام أغرَب مِن فيلِم

جَوّه ألعَمايم ْ

مَخفيّه أموال إلبَلَد

ما هي تَهايم ْ

بِجيوب ناس إتمالَحَت

بأرقى العَواصِم ْ

غِسلَت ْ أموال الوَطَن

سَوّت جَرايم ْ

خَلّت شَعَبها لِلأسَف

مَحروم  صايّم ْ

مَحّد يحاسِب هَل ّ وَكِت

سِكتَت ْ مَحاكِم ْ

يا ناس مِقياسي حِسَب

حَتى إلدَراهِم ْ !

  *   *

مِقياسي دا يقره عَجِز

عِشرين بالمِيه

إلجبوري ما يدري إلحِصَل

خِسرَت ْ الماليّه

نِسبه رِدِت لأهل إلفِكِر

وبكل حِسِن نيّه

طِلعولي خَمسه إتلاطِموا

جَنهُم حَراميه

كَالولي لا عِلِم وفِهِم

خَلّيها أمّيّيه

نتمتع بهذا ألرَقم

طِلّعت ْ إلخَرجيّه !

ثاريها حَسبه إمدَبَره

ضِد الثقافيه

مِقياسي أشرّها بعَجَل

ما أتأخر إشويّه !

زهير كاطع الحسيني

• < السابق
• التالي >