دارميات// ميسون نعيم الرومي

• 

تقييم المستخدم:  / 0

سيئجيد 

تم إنشاءه بتاريخ الأربعاء, 20 شباط/فبراير 2019 10:28

كتب بواسطة: ميسون نعيم الرومي

الزيارات: 3066

ميسون نعيم الرومي

عرض صفحة الكاتبة

دارميات

ميسون نعيم الرومي

هذا الوطن مضيوم .. يوميـّـه حـَـسبـَـه

فوگ الفقر والموت ..كل ساعه نكـّـبه

***

ما اكره آنه الروح .. لن روحي ثوره

ما يقبل العيبات .. والروحه حرَّه

***

اشمـَـحـْـله لعد والچا .. وياهن احاه

هاذا الوطن بالروح .. مابيـَّـه انساه

***

گطان اوسمچ بالهور.. والطابگ اوياه

واللبن والزبدات .. مگدر أنه انساه

***

طش الوكت وياي .. طشش ضعنه

ريشه ابمهب الريح .. وابگـَـلبي ونـَّه

***

بالك تدوس اهناك .. واتفزز الموت

تدمع أرض بغداد .. ما نسمع الصوت

***

محتاجه أنٓه بغداد .. تمسح دمعتي

مشتاگه روحي .. ليچ يالبيـّـه عشتي

***

اهل الوفه و الطيب .. ولدچ بلدنه

تاج انتو فوگ الراس .. كلكم محنه

***

لاعتب ينفع بيه .. لا يسوه تفكير

يمشي اويطش بالشوك .. وابلايه تدبير

***

نتگاوه ويه الضيم .. وين النفاهه؟

ديرتنه تبچي دوم .. ليل اولفاهه 

***

عفيه علينه انگوم .. نضحك ونمشي

جار الزمان اهواي .. مابينه نحچي

***

هذا العراقي ايلوع .. كـِسروْ اجناحه

مرت چثيره احروب .. ماشفنه راحه

***

ضيعنه كلشي اوراح .. بس ظلت اجروح

بالگلب تنزف دوم .. ماتطفه بالنوح

***

يحله الفرح بالعيد .. وي لمة احباب

بالغربه مامش عيد .. والفرح چذّاب

***

چا هوَّه مو بالكيف ! مزمن حزنه

كلما تمر اسنين .. تولينه مـِحـْـنـَـه

***

حلمانه آنه اليوم .. والگلب مهموم

اعتذر خوتي اهواي .. والحزن ميدوم

---------------

شباط / 2019

سـتوكهولم

عنوان البريد الإلكتروني هذا محمي من روبوتات السبام. يجب عليك تفعيل الجافاسكربت لرؤيته.

• < السابق
• التالي >