ما تغرگ مراسينه// ميسون نعيم الرومي
- تم إنشاءه بتاريخ الجمعة, 10 تموز/يوليو 2020 20:05
- كتب بواسطة: ميسون نعيم الرومي
- الزيارات: 2534
ميسون نعيم الرومي
ما تغرگ مراسينه
ميسون نعيم الرومي
امن ابعيد نتفگد بعض
نار البعد تچوينه
انگطعت ابتوت البالگلب
وامخزنه شرايينه
خشخاش روحي صفت
والوكت سابينه
كل يوم طرگاعه ابشكل
حاضرنه چن ماضينه
***
صفصاف نرجف كل وكت
والموت والينه
هانت نگول اونمتحن
ثاريهه تلعب بينه
غربه نموت ابلا وطن
والوطن ناسينه
حصتنه منه بس مرض
والدوه خافينه
***
بالتال صرنه يا شعب
و(الصدقه) .. حلت اعلينه
عصابات تحكم بالوطن
تكتل اوتـذبـَح بـيـنـَه
مجلس قضاء اومدعي
مشهود الجرم واتعينه
مگرود يالتحچي عدل
دمـَّـك تطشــر وينه؟
***
*(أطوار) ذبحـوا من گبل
والعـدل چا ويـنـَه
*(مشذوب) كتلوه ابكربله
*بالبصره (عبد الصمد)-
بغداد بالدم اغـْـرِگـَـت
*و(الهاشمي) امدمينه
*الآف جرحى ياوطن
ميات ماتـوا عـيـنـَه
أقـلام حـرَّه سـَـكِـتوا
للوطن چانـت زينه
***
مجهول يذبح بالشعب
والجار غـازيـنه
اوجوه تتبدل تضل
والفگر والينه
يا دهر والله منصفت !
ما تگـدر اعـلينه
ما نرضه المذله بعد !
اسباع والله اهالينه
يوم القريب اوتنتفض
تنقـذ مراســينه
ما تغرگ مراسينه
لا.. ما تغرگ مراسينه
------------------------------
*الاعلامية (أطوار بهجت) اختطفت واغتيلت مع طاقم العمل أثناء تغطيتها لتفجير ضريح العسكريين في سامراء في صباح يوم الأربعاء 22 شباط 2006على يد مسلحين من قبل جماعات مجهولة
--------------------------------
* اغتال مسلحون في محافظة كربلاء، السبت 2 فبراير 2019 الكاتب والروائي العراقي علاء مشذوب امام داره وتفيد المعلومات بأن 13 رصاصة اخترقت جسد مشذوب ادت إلى وفاته على الفور
---------------
*اغتيال الإعلامي أحمد عبد الصمد في البصرة يوم 1/1/ ا2020 الذي ينقل الحقيقة واثناء نقله للتظاهرات من قبل مجهولين
--------------------
اغتيال الخبير الأمني هشام الهاشمي في يوم الأثنين 6/7/2020*
https://ar.wikipedia.org/wiki/%D9%87%D8%B4%D8%A7%D9%85_
%D8%A7%D9%84%D9%87%D8%A7%D8%B4%D9%85%D9%8A
----------------
*عدد المغدورين في انتفاضة تشرين بلغ حوالي 1000 شهيد وحوالي 30000 جريح منهم حوالي 4000 معوق -(من قبل نفس الأيادي الآثمة)-
-------------------------
9 / تموز / 2020
سـتوكهولم
المتواجون الان
502 زائر، ولايوجد أعضاء داخل الموقع