شعر: رحيم الغالبي

يا ..شنهي  اموت واحبك

 

الى مظفر النواب لذكرى 43 عام لثورة اهوار الشطره

 

يا شنهي اموت واحبك

 

بعيونك اموتن ، حتى افوتن .

.بابك المسدود ، ماشافه

الحلم مرّه

 

نديمي العمر ردته اوياك ما صاح

ازت روحي مسافه

طاح الزمن وكله , بحزن وانياح

لا شرجي ولا غربي تهب ارياح شفنه الحنطه كلها صوفرت...

والسنبل عله المسطاح ، ذابل ....

فارغ من الحبه ...

ظل يحلم تبن ...

يحلم تبن ، مو تين !!

 

وبكل جفن مرواح ، محّد فزز الناطور

ا

موسم اجه

وموسم راح

وموسم بالحلم ينزع ثياب السهره والافراح

شفناهه جذب

 

من صبّح المصباح !!!!

وكبل ما كتلك ، اريد اتخلي ايدك عله خد الوسفه

واصبع تعظ للندم

اخر ليله من سديت العمر للموت اتاني

وطاح من ايدي القلم ،

...... بس آنه نايم ..ماحلم ...آنه نايم واعي ما حلم

اخر ليله طاح النجم

وراسك عالي لا ماطاح

 

والحلم والالم طول اسنين

.... ما مر ( .............

بالنفسج رازقي وقداح

 

.......... ولاشجرة عنب ، لايثمر التفاح

(( مرّانه .. حمد ..

ذاك الزمان وراح

عله عيوني .. رسم خطوات هجرانه

وتعده أعوام عمري،،

ورك شجره يبس ،من اغصانه

، حش منجل فركته ،

الغاب عنه اسنين ، بس ما غاب ...

كل جلساتنه ويانه

جذر شجرته .. لعلو السمه ..اتسمت

شجرته

الزاهيه الكالوا *خبيثه *

اتفرعت كلها..محبه

ياحبيبي

انت زخّت

زخت مطر وبغدرانه ، سولفولي

من زمان

اسرارك.............

وافكارك.........

تصاوريك بعرس الهور..

والكصبات .والبردي سولفلي ياجدّي

جنت حدّي... بسواليفك...

بمشاحيفك ..بصوت الماي والمردي

سر ضميت بيه اسرارنه ..

تاخذنه واتودي

عرس ( خالد زكي ) لليوم

هلهوله تطر وسط الغموكه*

الخوفت تيجان

تدري بكل نشيد الثوره (لمظفر )

يكوم الهور والبردي والمعدان...

وتطك للبصره لهوار العماره صويحب ، وغيلان

ازيرج عمامه

وتسير كلها الزلم والنسوان...

كلها تصيح يا بغداااااااااد

يابغدااااااااد

شعب الهور احنه :

ضيعنه زمن قواد( لا مو قوّاد كوّاد )،

 

,,,,,-----------------------------------------------

لعيبي * الشيوعي الاسم والعنوان

**القصيده هدية لاستاذي ومعلمي الفذ مظفر النواب

اهديت له في ديواني الذي صدر هذاالعام بعنوان= جسر من طين=منشورات مجلة الشراره للحزب الشيوعي في النجف