كـتـاب ألموقع
وين تشرد منه ياشعب العراق// عباس طريم
/ 0
- المجموعة: عباس طريم
- تم إنشاءه بتاريخ الثلاثاء, 29 آب/أغسطس 2017 21:04
- كتب بواسطة: عباس طريم
- الزيارات: 2656
رسالة الحرامية.. الى الشعب العراقي
وين تشرد منه ياشعب العراق
عباس طريم
اريزونا
وين تشرد منه , ياشعب العراق
الله سلطنه عليك
اين المفر ؟
+
احنه .. طوقناك من اربع جهات
وكل طريق انسد عليك
اوكل ممر
+
ولو بدينه , الماي كطعيناه عليك
بس حضرتك .. تدري
بيدالله المطر
+
النه بس .. خيرات كل هذي البلاد
وانته من الخير , حصتك
بس نظر
+
انته بس تسمع , ابخيرات العراق
ما الك كل شي , اذا
زاد وكثر
+
صار طابو البلد , والعنده اعتراض
لا ايدردم , هذه مفتوح
السفر
+
احنه نتمنه الشعب , لاجيء يصير
ويشوف له ابارض الله
عنوان ومقر
+
واحنه سهلنه السفر , عبر المطار
وبعد مفتوح السفر
عبر البحر
+
وصعبه , صعبه اهواي ننطيكم مجال
اتعيشو مثل العالم , اومثل
البشر
+
كولو سراق , اوحراميه , اولصوص
ما يحركنه المقال
ولا الشعر
+
المهم عدنه .. الخزاين والفلوس
واليعارضنه .. نطم حلكه
ابحجر
+
احنه .. فلشنه البلد من الاساس
اوخلي يتفلش .. الى قير
وصقر
+
لازم انخليه .. كاعد عالحديد
امفلش .. اومن ميه
يرجع للصفر
+
يالبنيتو البلد , بالجد والكفاح
احنه زحناكم .. اوصار
النه الثمر
+
احنه صرنه اهل البلد , واهل الديار
والفرق ما بينه .. ازداد
وكبر
+
احنه .. ندري المرض والهم والشقاء
بين افراد الشعب
كله انتشر
+
والحزن عم, ابتقاسيم الحياة
والالم شك الكلب , شك
اوظهر
+
بس نظل انبوك , اموال العر اق
بالنهار , وابد ما ناخذ
حذر
+
لان احنه .. انبوك بيه , واحنه الحماة
احنه حامي, والحرامي
المختصر
+
ولان لا احساس , عدنه ولا ضمير
ولان , جن واحدنه مو من
البشر
+
ولان ما نذكر ابد , رب العباد!
ولان وسط انفوسنه , الشر
انتصر
+
صار كل اصرارنه , اندمر البلاد
وننهب أمواله , ونسبب له
الضرر
+
ابكل صراحه انكولهه , ابارض العراق
خير واجد , مثل جريان
النهر
+
واحنه .. رغم البوك كل هذي السنين
ما انهد البلد . وانعيد
النظر
+
الغوث صاحت منه , كل المسلمين
اوشفنه بعيون الشعب
كل الكدر
+
وشلنه اموال اليتامه , البالعراق
اوظلت اعله الخبزه والجاي
الاسر
+
ما تعاملنه ويه عالم , اوخبير
اله شال , ابليل من عدنه
اوطفر
+
وما اجت تبني البلد بعض الوفود
وشافت اكلاواتنه , وصمدت
شهر
+
وما اخذ واحد عقد , وارتاح بيه
اله دفعناه , وخليناه
خسر
+
حته هيئات الامم , صاحت الغوث
وصنفونه اول على
كل البشر
+
بالنهب والبوك , وباكل الحرام
وبالرشاوي العادي صارت
والهدر
+
احنه ياهو ايطب علينه , انكله كوم
ادفع المقسوم , مفتوح
المجر
+
احنه من جنكيزخان , اكثر بلاء
واحنه من ابليس , وأولاده
اشر
+
احنه اقسمنه , بحق رب السماء
انكلي هذه الشعب , وانشبعه
قهر
+
وين تشرد منه , ياشعب العراق
الله سلطنه عليك
اين المفر ؟