اخر الاخبار:
  • Font size:
  • Decrease
  • Reset
  • Increase

كـتـاب ألموقع

تدري اشكثر عانينه ..؟// ميسون نعيم الرومي

تقييم المستخدم:  / 0
سيئجيد 

ميسون نعيم الرومي

 

عرض صفحة الكاتبة 

تدري اشكثر عانينه ..؟

ميسون نعيم الرومي

 

احنه الطـَشَّـشنـَه الوكت

احنه التاهت مراسينه

احنه النموت ابسكته وبلا حس ..

والعشنه غرب ..

اوبين المگابر غرب .. والزمن ناسينه

احنه الاسمـْـنـَه بين الدول .. والمحـَّـد علينه سأل

تدري اشكثر عانينه ..؟

***

احنه الكتبنه ع الزمن .. قصص واسوالفنه الحزينه

نضحك بالچذب .. من حرگة البينه

احنه العشگنه النخل .. والوادي ويه الجبل

والهور ابگصْبـَه والبردي .. احنه الندري .. بس ما درينه !

احنه الحبينه السمه والگمر وانجومه

وابدمنه عاش الوطن واهمومه

اودجله اوفرات الغنه غناوينه

تدري اشكثر عانينه .. ؟

***

احنه انخلقنه ابوطن ماشاف راحه ابيوم

يحكـْمـَه رعاع اوصغار القوم

بي تنهش دول واتبوگ ثرواته

عايش ع الكفاف ! اشكثر عازاته !

امحسر يشعبه بالفگر والموت والينه

احنه الخطيه المانعرف خطايانه

تدري اشكثر عانينه .. ؟

***

احنه البـَـيـَّـن علينه الكبر

احنه الضاع من عدنه العمر

احنه الخلص بينه الصبر

احنه الغـِـدَرنـَه البحر

احنه البينه ضاگ السفر

احنه الماعدنه جوازات

احنه الوگفنه ع السفارات

احنه البلدنه باگته الجارات ..

واتسيد الجاهل والغبي والعارات

احنه الولدنه مساكين .. احنه الماعدنه عناوين

احنه العراقيين

احنه خطيه المانعرف خطايانه ..!

تدري اشكثر عانينه .. ؟

تدري اشكثر عانينه .. ؟

-----

22 / كانون الثاني / 2022

ســـتوكهولم

 

للاتصال بالموقع

عنوان البريد الإلكتروني هذا محمي من روبوتات السبام. يجب عليك تفعيل الجافاسكربت لرؤيته.

عنوان البريد الإلكتروني هذا محمي من روبوتات السبام. يجب عليك تفعيل الجافاسكربت لرؤيته.

عنوان البريد الإلكتروني هذا محمي من روبوتات السبام. يجب عليك تفعيل الجافاسكربت لرؤيته.