كـتـاب ألموقع

شكرا منتخبنا الوطني// ميسون نعيم الرومي

• 

تقييم المستخدم:  / 0

سيئجيد 

المجموعة: ميسون نعيم الرومي

تم إنشاءه بتاريخ الخميس, 19 كانون2/يناير 2023 21:22

كتب بواسطة: ميسون نعيم الرومي

الزيارات: 1374

ميسون نعيم الرومي

عرض صفحة الكاتبة 

شكرا منتخبنا الوطني

ميسون نعيم الرومي

شكرا (منتخبنا الوطني) – فدوه يعيني الشبان

ولد (العراق) الابطال – والشعب بيكم عشمان

-(أيمن حسين) الهدّاف – والمنتخب عالي الشان

اجمعتوا الشعب كله اليوم - هيبه وطن يا شجعان

كل الهله بالشبان

هـذا (العراق) التاريخ – (ازهار) شعبه الوان

متـشـابگه الإيـد ابأيـد – أهـله كرام اواخـوان

-(العرب) منهم و(اكراد) – وانواع بيه (الأديان)-

من زمن سومر وآشور – واحنه الحضاره عنوان

اجمعتوا الشمل يالشبان

(فگـْرَوا) بلادي اودمروه – (زَوْرَوأ) العمله اطنان

فرغـَـوْ وطنه اومسحوه – نِگـْـلـَوا الثروه الايران

لعـبوا لعـب ما ينوصف – غيرَوا حتى الإنســان

كلشي خرب كلشي انداس - كوشت علينه طهران

انتوا الأمل يالشبان

-(انسينه) الفرح من اسنين – والشعب كلش تعبان

التمت عـلينه الســراق – (انباع) الوطن للجيران

باگوا نفطنه والخير – و(اچماله) صاروأ عـدوان

اتوحد (شــعبنه) هاليـوم – رد الأمل للســكان

شفتوأ يعيني الشبان ؟

فدوه يعيني الشـبان – نـفـرح اوننشــد الحان

الوطن كله منتشي – حتى النخـل والشـطآن

والطير غنه ع الشجر – وانزوت كل الحيتان

اولاياتنه التسند بعض – گلب او وريد اوشريان

عيني ولدنه الشبان

بصرتنه حلوه امعدله – اجمعتي العرب بالأحضان

اهل (العـراق) الامجاد – رمز الكرم والاحسـان

هذا الخليج العـربي – طيـبـه اوكـرم من ازمان

تاريخ عدنه مشـتـرك – والگلب بيكم فـرحان

كلكم عزم يالشبان

عاش العراق المنتصر- والفرج گرب هالبان

باچر يهـب او ينتفض – انتوا الأمل يالشبان

فدوه (اسود) الشطين – للنصر انتوا العنوان

شكرا (منتخبنا الوطني) – فدوه يعيني الشبان

هله او هله بالشبان

شكرا ولدنه الشبان

------------------------------------------------

ســتوكهولم

19 / كانون الثاني / 2023

• < السابق
• التالي >