الى شبيبة تشرين الأبطال// ميسون نعيم الرومي

• 

تقييم المستخدم:  / 0

سيئجيد 

تم إنشاءه بتاريخ الأربعاء, 02 حزيران/يونيو 2021 19:47

كتب بواسطة: ميسون نعيم الرومي

الزيارات: 2338

ميسون نعيم الرومي

عرض صفحة الكاتبة 

الى شبيبة تشرين الأبطال

ميسون نعيم الرومي

خوات الأخوة يابنات - عزم تصميم اوثبات

ليلو الماس اوجمال - قداح جوري او نبات

ارجال چنهن بالشجاعة - شرف عفه امصنصلات

لبوه وحدتهن عنيده -ع الشــدايد قادرات

ايد بيد اويه اخيهن – عزَّه..كرامه امعدلات

جيل صاعد چن حديد - انتفض، مل السبات

قرر ايحرر وطنه - ينقذ اهله امن الطغاة

بيكم الدنيه نباهي - نفتخر احنه الأمهات

يا شبيبه الوطن غـَـنـَّه - فرح دجله والفرات

اخضاضه صار الماي بيهن - انباع سكته امن الحفاة

والنخـل بادوه كله - ابكل وقاحه هالعتاة

يا جرمهم يا جبنهم - كتلوا اولاد الصابرات

شهداء الوطن كثرت - كمر يحضن ابنجمات

*(محمد)(ماجد)(علي) - ابحلگي ناحت الچلمات

ابزفه طلعوا للشهيد – ابدمهم اتحنت الرايات

*والشهيد البطل قائد – (ايهاب) يبن الفرات

دمكم الطاهر ينادي – يطلب انصاف الحياة

وطن بيه القتل حرفه – بيه البيوت امكدرات

الوطن منهوب ينحب – (بغداد) يم النائحات

منظمات اتواطأت كلهه - والدول ليش امغلسات

سارق اومجرم كتلنه - نشكي المن يا بنات

يا شبيبه يا أملنه - ولد بابل والحضارات

يشهد التاريخ الكم - بالشجاعة والثبات

خوات الأخوة يابنات - عزم تصميم اوثبات

------

*الشهيد محمد جاسم:-شهيد تظاهرات 25/آيار2021

مواليد2003 ابن الديوانية قتل في ساحة التحرير

الشهيد الشاعر الملحن ماجد گزار:- من ثوار بابل

الشهيد علي إيهاب الموسوي:-ابن الديوانية مواليد2000

*الشهيد إيهاب الوزني:- ابن كربلاء قتل بدم بارد في كربلاء

وعد الكاظمي انه ( ســـَ ) يحاسب قتلته وقتلة المتظاهرين

--------------------

2/ حزيران /2021

سـتوكهولم

• < السابق
• التالي >