اخر الاخبار:
مدينة آشور الأثرية في متحف التراث السرياني - الخميس, 17 تشرين1/أكتوير 2019 10:01
  • Font size:
  • Decrease
  • Reset
  • Increase

إشلونكُم أَهلي الحَبايبْ بالعراق// فاضل البياتي

تقييم المستخدم:  / 0
سيئجيد 

فاضل البياتي 

 

 

إشلونكُم أَهلي الحَبايبْ بالعراق

فاضل البياتي

السويد

 

أهدي قصيدتي الجديدة هذه التي تَفيضُ بالمَشاعِر الجَياشةِ والعَذِبة، والغنيّة بالدَلالاتِ ألإنسانية، أُهديها لكلِ أبناء وطني العراقيين المغتربيين، ومن ثم لكلِ أبناء وطني العراقيين في داخلِ العراق، ولكلِ إنسانٍ يُعاني سُقم الغُربَة.

 

إشلونكُم أَهلي الحَبايبْ بالعراق

آني أخصكم بالمحبه وبالسلام

آخ يالصوت ألشَجي والبَعيد والحزين

من يناديني بحنينٍ وبهيام...

وَانته يلّلي، تدري أنته منهو أنته..

لَمَنْ أتذَكّرعِشِگنه

إيضِيع من عندي الكلام

إشلونك عيوني حَبيبي

كيف أحوالك... تمام؟

*

بالمَنافي

ماتسليني الأغاني ولا قناديل الشوارع

ماتشكّلّي إهتمام

صارت الغربة عناوين ومطارات وألآم وصَبر.

وكل رسايلكم مواجع

أدري مكتوبه بدمع مو بحروف وحِبر

تسأل شلونك عيوني كيف أحوالك تمام.

والمنافي تظل أوهام

أوسَراب..

تبقه ظمأنه المنافي

كيف يرويهه سؤالٍ، مِثل گطره مِن مُطر

أبرساله لو خطاب

يسأل، إشلونك عيوني كيف أحوالك تمام!

لاتعاتبني وَأعاتِبْ..

تًبقه عَطشانه غُربتي مايكفيهه سَلامٍ لو كلام

وحشه، وين ماوجهي إيتلفّت

چَنّي مو بين البَشر

چَنّي ساكن إبيَباب

مو أبلِبّ الزحام

وبحَشِد صاخِب

وصَدى صوتك من بَعيد يملي روحي ودنياي العَجيبة بالعِطر

أسمع أتگُلي حَبيبي ماكو داعي للتجافي

كيف أحوالك... تمام؟

لاتعاتبني وَأعاتِبْ

دونكم شفنه العذاب

گُلي شيفيد العتاب!

إسنيّن ضاعت بالمَهبْ

مابين توديع وقُرُب

بَعَد ميفيد العِتاب

كلشي هاجرني وهجرته

حتى ضِحكي الچان صاحِب

عَبّس أبنُص الدرب.

*

إشلونكُم أَهلي الحَبايبْ بالعراگ

ماكو مُهجه ولاگلُبْ

يتحمّل بَعد ضيم الفراگ

كافي هجره يلحَبايبْ

لو أوَدّع وآني ببلادٍ بعيدة

كل مشاريع العمر والأيام

لو نجد حلٍ سعيد للمتاعِب

ونتلاگه بعد مُرّ الغياب

ويرجع ألعِشِگ القديم أبسلام وبوئامٍ

إشلونكُم أَهلي الحَبايبْ بالعراق

كيف أحوالكم... تمام؟

 

الشاعر والفنان والكاتب

فاضل صَبّار البياتي

 السويد

4 حزيران 2019

أضف تعليق


للاتصال بالموقع

عنوان البريد الإلكتروني هذا محمي من روبوتات السبام. يجب عليك تفعيل الجافاسكربت لرؤيته.

عنوان البريد الإلكتروني هذا محمي من روبوتات السبام. يجب عليك تفعيل الجافاسكربت لرؤيته.

عنوان البريد الإلكتروني هذا محمي من روبوتات السبام. يجب عليك تفعيل الجافاسكربت لرؤيته.