كـتـاب ألموقع

بغداد يا عشگ الأزل// ميسون نعيم الرومي

ميسون نعيم الرومي

 

عرض صفحة الكاتبة 

بغداد يا عشگ الأزل

ميسون نعيم الرومي

 

-(بغداد) يا عشگ الأزل – شوگ اودفو بحضانهه

كل شارع اوبيت اودرب – ريـحة وفـَه باعـْطافهه

والنخـله وي طرت الفجر – اتشـع بالدفو انفاسهه

-(فختايـه) والبلبـل غـرد – نورس حمام اصحابهه

والناي للشـاطي يحـن – وكت العصر يـحلالهه

***

يا (دجله) عشگـتهه الشمس – تغـْـفـَه تنام ابمايهه

والگـمـر ليـليـّه يجي – فضـَّه يطـِش وابگاعهـه

قـدّاح واقـرنفـل ورد – عـِطـْره يـِـفـِح بكتارهه

ميـوَتـْهه وامخضر طـَعم – مثل العـسل اعنابهه

والگاع لو نـَـثّ المطر- ريحة عـِـطر باترابهه

***

بساتين النخل ما تنوصف – تلمع ذهب ارطابهه

-( بغداد) حـلوه امدلله – لگعـِد واحني اجدامهه

أم (النبايه) ابكل زمن - انجوم السمه خلخالهه

بالشـَعر تتباهه اوتـِنـْـثـِرَه – لون الكحل,, لجتافهه

كرخ اورصافه اوالجسر- عيون (المها) ابنياتهه

***

-(بغداد) أمّي اوهلي – ابروحي تنز اجراحهه

يحبـيـبه طال الظلم – ضيم الچـثـيـر الصابهه

حلوه ، أبـيـّه ، امعدّله – لفـَّـت ولدهـَه ابشـالهه

-(بغداد) مرمرني البعد – روحي تحومي ابابهه

يمته الخلاص اشوكت؟ – ضحكه ترد لشفافهه

ضحكـتهه ترد لشفافهه

-----------------

20/آذار/2022

سـتوكهولم