• روحي هامت
- تم إنشاءه بتاريخ السبت, 04 حزيران/يونيو 2011 11:28
- الزيارات: 2323
شعر: حامد كعيد الجبوري
روحي هامت
بيك روحي هامت وحكها التهيم
أبصبري يا عمر العمر ووروده
جنت كبلك ميت وتوني أحتييت
وردت أيام الفرح وسعوده
عيون عندك لا ولا كل العيون
كحل رباني وحوار وسوده
وحاجبك سيف وتعطّش لليعيل
أمنين أخلص ركبتي الممدوده
خاف أشبه شفتك كوثر زلال
روحي جمره ومي لماك أبروده
لحك رمانك تفطر من حلاه
أمنين نوصل حارسات أزنوده
خنيبت1 روحك عسل فاض الخدود
وذبل عودي وتقبل أبصيهوده2
أحسب وياي الدرب خلص ونين
وكل مفاتيح الفرج مسدوده
آنه علمت اليتامه أعله الدموع
ومن لطمها أشحصلت شمهوده
أفتحلي كلبك وأخذ مني أشما يكون
وهاك عمري الحضرتك مكصوده
أبشارة اليمه وبيارغ أعتنيك
وخبزة العباس نذري أبزوده
من أشوفك أطفي كل شوك الزمان
وأعتني القاسم وأنخي أجدوده
أشموع خضر الياس أضويها الشطوط
ونذر للكاظم عليّ أشهوده
أيلوح طولك وأحضنك شوك الفطيم
وبيدي أشيلك وألكط أبعنكوده
هناك وبتالي العطش أسبح وأهيم
وأصعد أتلال وأرد ردوده
خوفي أشمك وأسبح ابماي الوصال
وكلبي أسمعك دكته ومنكوده
وتحت ظلك أشم كل ريح الجنان
وساعة الموت أصبحت مريوده
----------
1 خنياب : النهر الطافح بالماء
2 صيهود : جفاف النهر
المتواجون الان
687 زائر، ولايوجد أعضاء داخل الموقع