كـتـاب ألموقع
رحنه انزور وي جدتنه خاجيه// عباس طريم
- المجموعة: عباس طريم
- تم إنشاءه بتاريخ الثلاثاء, 15 كانون1/ديسمبر 2015 20:06
- كتب بواسطة: عباس طريم
- الزيارات: 2171
رحنه انزور وي جدتنه خاجيه
عباس طريم
رحنه انزور وي جدتنه خاجيه
ولن الناس وسط الدرب
عاريه
شي شالت كتب.. شي تهتف: الاجيال
كلهه اتريد هذه اليوم
حريه
صاحت جدتي .. خاله يهل حفاي
كلولي شجاكم
يالعريضيه
لا عدنه نفط لا كهربا لا غاز
وتجينه وتنكطع مرات
الميه
خبيزه اليوم اكلنه وي استكان الجاي
واتعشو افروخي ابفرد
زوريه
خلف الله عليه الحجيه مرت اعناد
ودت شوربه وتمن
وركيه
حريه ولطمتو هاي عشر اسنين
يمه اشلون لو ردتو
اشتراكيه
اظن قرنين وسط الشارع اتصرخون
واطلابتكم اترد مثل ما
هيه
وكالت جدتي وروح امي جذابين
من وجوههم يردون
خرجيه
اذا طك الفشك ما تلكه نافخ نار
يمر ابطاري الحداث
السياسيه
وذا شرطي يصيح اشعدهه هاي الناس
كل واحد يصيح : اي صدك
شنهيه
المطالب.. ما تجي ابسد ساحة التحرير
اتريد ارجال سمره وصدك
نشميه
ويطلعون طلعة ويهتفون ابصوت
ويسمونهه الطلعه
الحضاريه
لا بيهه شتم لا قذف لا تكسير
للاصلاح تهدف مية
بالميه
ويكولون بويه يالسياسيين
راح اتموت هذا الصيف
خاجيه
جا حته الهوه اتكطعونه عن الناس
ارحمو الناس خاله
يالافنديه
سودنتو الشعب خليتو راس ابراس
تتناطح .. وكلهم حاله
نفسيه
امحيسن جارنه من الحر وكع مرتين
والدكتور كال انلهبت
الريه
الحرارة ابجسمه وصلت اكثر من الفين
وافيوزات مخه ايكول
مشويه
يخاله الحر كتلنه وبعد ساعة انموت
واظن مكتوبه موتتنه
جماعيه
ولكم كهربا حطونه , اوفرهود
روحو فرهدو وشيلو
الماليه
يهل البرلمان الما يراعي الناس
الله ايبربده ويفضح
بلاويه
ويكصر عمر كلمن يدك بالناس
ويشتت شمل كل
الحراميه
ازرعو الطيب يمنحكم شعبكم طيب
صدكوني الحياة ايام
مكضيه
رب الكون يمهل .. ما يعوف ارجال
تسرح .. والشعب مكسور
ساريه
شعب ضاعت ضحكته وما سمعنه اليوم
بس ادموعه التهيل
ونواعيه
عباس طريم
المتواجون الان
544 زائر، ولايوجد أعضاء داخل الموقع