كـتـاب ألموقع

الأمل موجــود// ميسون نعيم الرومي

• 

تقييم المستخدم:  / 0

سيئجيد 

المجموعة: ميسون نعيم الرومي

تم إنشاءه بتاريخ الخميس, 29 آب/أغسطس 2019 10:40

كتب بواسطة: ميسون نعيم الرومي

الزيارات: 1978

ميسون نعيم الرومي

عرض صفحة الكاتبة

الأمل موجــود

ميسون نعيم الرومي

اجـلبنكم يليلي والأمل موجود

يهب يوم الوطن ماضيه كله ايعود

يطرد شرذمه الجتنه مثل الدود

ميطول الزمن والزمن خو معدود

والخضراء تصبح سـجن ندريبه

اجلبنك يليلي الف تجليبه

***

اجلبنك يليلي والوطن مبيوع

كلشي انباع خالنـِابچي نصب ادموع

لـِفانـَه الضيم والحرمان ! شعبي ايلوع

آلاف الحمايه .. اوما تِـفـيد ادروع

لو يصعـَد (سـِـمـَه) واحدكم انجيبه

اجلبنك يليلي الف تجليبه

***

اجلبنك يليلي والعراق انباگ

بگـتوْ ضحكة الأطفال والعشاگ

چـِـنتوْ بالغـَرِب تمشون راگ الراگ

واحدكم عـَـميل اوبالعصه ينساگ

(ملياردير) صار اومنتفخ جيبه

اجلبنك يليلي الف تجليبه

***

اجلبنك يليلي والشعـَب ميموت

خرايـِب يالوطن مابـقـَت بيك ابيوت

نهايتكم قريبه .. من يصيح الصوت

يـِهـِب اعراقنه اشماله اوجنوبه اوكوت

ارصاصة شعبنه الخاين اتصيبه

اجلبنك يليلي الف تجليبه

***

اجلبنك يليلي ! الماضي خو معروف

تاريخ العراق اقراه وانت اتشوف

چم حاكم حكم يوم اوصبح منسوف

*(بالحفره) او(عبايه) امن الرعب والخوف

ما تنفع ختلته العاش بالخيبه

اجلبنك يليلي الف تجليبه

-------------------

*الحفرة اشارة الى حفرة صدام

*العباية ترمز الى رئيس وزراء العراق (نوري السعيد)

عند ارتداءه العباءة النسائية هروبا

من غضب الشعب في ثورة 14/ تموز/ 1958

------------------

آب / 2019

ســـــــــــــتوكهولم

• < السابق
• التالي >