هاشم الموسوي

مساهمات اخرى للكاتب

من الشعر الشعبي 

  نهر ما تۤشبۤه الانهار

من چنا نجوم ازغار

چان الليل يوحشنا

و چنا نريد

يطلع فدْ گمَر نوّار

يبشرنا بشهر آذار

وهَسه انگول

بعد سنين من ذاكْ

الطلوگ الجابته الاقدار

حِلو هواي شهر آذار

من يطلع علينا بخير

بيده شموع

صينية فرحْ... وازهار

لًمْ الناس فرحانين

عرب واكراد

تركمان وازيدية وفيليه

سِنهّ وشيعة الكرار

من زاخو لحد الفاو

والحاسد بچه من لمة الاخيار

واحلمنا بعد مرْه

بنهر صافي

يسبح بيه گمر آذار

واتحقق حلمنا وصار

يانهر المحبهْ ألفرّح الاطيار

احچيلى بعد

من توصل ثمانين العمر وتزيد

اشعندك بعد اسرار

شو آنه چنت محتار

من زغري اشوف الناس

تحفر بالنهر

تزرع عالجرف اشجار

واگول اشجاها هالوادم

موعِدنا، چثير انهار

اثاريهم زِلم ثوار

من حفروا نهر ما يشبه الانهار

لَمْ كل البشر انصار..

وانكتبت عليهْ اشعار

سلمان التحبة الناس

من سومر اجه بشّار

حُفر نهر المحبة يعاونونه احرار

هلاهلنا ومضايفنا

علا الصوبين

عمارهْ وبصرهْ والكوفهْ

رُميثة والسماوة.. ونگره السلمان

حديثهْ وراوه والموصل

واطيوب المحبه وصلت ال سنجار

عزيز انت .. ولو تدري وراك اشصار

حفر نهرك عشگ

بگلوب كل الناس

لو ما هالنهر يجري

نظيف الماي والمنبع

ما چنا غسلنا العار

نظفنا الشوارع

من صور چانت تجيب العار

ولاچنا عرفنا اسرار

ولا انطانة النخل جمار

اشگد هبت علينا اعصار

سفنا بخير ياسلمان

سفنا تروح للبصرة

و تلعفر

تجيب الطيب والعنبر

سفنا كبار

بيها ركبوا الثوار

نام... انت .. قرير العين

واحنا نعاهدك

كل عام

هلاهلنا تجي طشار

ونهرك يمتلي ليلو

زمرد والعقيق الوان

نفرح من يجي آذار

ونجيب الشمس

ويا الگمر خطار