قاسم عجام

دوَه العكرب

               مرثية الشهيد المفكر قاسم عبد الأمير عجام

مستهدفوا قاسم كونه أبن عجام

مستهدف لأنه الفكر والمذهب 1

نعرفها الأيادي ونعرف الجاني

والعكرب الصفره أتخلف العكرب

والنفس اللئيمه أشما تعلمها

متطبعه أبغدر والراضها يتعب

الذيب أشما تصلحه بالطبيعه ذيب

والكلك ندجنَه واهم وجذب

والغير الكبر ميصير إلهم دار

ومثل طيحة صنمهم يومهم كرب

إذا شافوا سماحه من أهل هالدار

واليحمل سماحه أمقصر وأذنَب

ضيكه للحبل شد حيل وأخنكهم 2

وبس ترخي الحبل رد ألهم الملعب

إذا بحجة عمر زيد وزائده أنقادوا

تره السابع ظهر متسجل المطلب

وأفذاذ الرجال البسجون أتموت

وكبر صار الوطن ومحجم المهرب

عفا الله ما سلف 3 خنجرهم المسموم

أنغدر بيها النطقهخا وشعبه التعذب

دواهم حدر رجلك واضح ومعروف

وبس هذا الدوه ومن طبه لا تعجب

                                  ***

أشبلاهه وجوه غبره الشؤم عاليها

تستاهل اللعنه وكل ردي ينسب

تحملنه قساوة خمسه وثلاثين

ولانه أبن اللئيمه أبناب وبمخلب

أذا باع الوطن وأزلامه والخيرات

بيد الإحتلال الأجرم وأذئب

لا بعنه الوطن لا أنصافح الشاري

ونلعن لليبيع الوطن والسبب

                               ***

يامدرسة قاسم عاليه البنيان

ويا فكر النظيف أمن الردي أمشذب

ويا نسمة ترافه أتهب توالي الليل

وياريح الشمال أمن العذب أعذب

ويمضيف الفرشته أبلمة الخوان

يهلي لليجي وللطيب أمطيب

ويا كلب الجبير الوسَع كل الناس

ها كبره الكلب وأحضنهم ورحب

تمنيته يحاور لحظة الغدروه

أجزم جا قنعهم جانبه ويكسب

ياموسعه الفكرك تشهد الأجيال

يا صياد ليلو أصياغه ومذهب

يعامود الجبير الشال كل البيت

أبشرك ظل مظيفك عالي ومرتب

الشهيد أبلا جفن متشرع أيدفنوه

لأن ماكو جفن هالتضحية أستوعب

                             ***

1 :أعني الطريق وليس الطائفه

2 : فضيق الحبل وأشدد من خناقهم / أستفادة من الجواهري الكبير

3 : إشارة لمقولة الزعيم الوطني الشهيد عبد الكريم قاسم