أبن الجيش ( شعر شعبي )

حامد كعيد الجبوري

 أبن الجيش

آنه أبن العراق الراضع النهرين

وحب كاعه ورجاله وجيشه المأصل

آنه أبن الصُميده الوارث الفقار

الهد الجاهليه وجم بطل جندل

اليبرّزله أنكتل والينهزم ينجه

واليكشف سؤته أبعورته أتختل

أبو حفصه عمرنه العادل الفاروق

سن درب الأمانه البيها نتمثل

أبن حسين آنه ونخوتي العباس

من يغضب رعيد وصاعقه أتنزل

آنه أبن الزعيم الدوهن أستعمار

وحيّر للعقول ولا درب تندل

الرتبه أتلوك أله وبجتافه مهيوبه

الشجاعه والنزاهه بشخصه تتمثل

الحفظ جيشه وعراقه وحبه كل شعبه

ولا دوّر حفيره أتعفنه وينذل

                            ***

ولد الجيش أحنه الفقره والعمال  

البنه صرح العراق أبدمه وبمعول

بالقصعه ربينه وغيرة الصمون  

واليكرط ملحته صافي ومعدل

ولاجنها حضيره خرجت أجيال 

وعلمتنه الرجوله أبمصنع الأول

الجيش أبن الشعب ماواله كل صدام 

ولاخان الأمانه وسيرته أتبدل

جيشك هم ضحيه وشعبك الذبحوه 

وتـنفّذ تآمر رغبة المحتل

نهض جيشك بنالك شرطه والصحوات

وحافضلك عراق وبيكم أتكفل

تره فشله عليك وأنت أبن أجواد

تسمي أشجع رجال الجيشك المنحل

                            ***

كل عام اليمرني أبسته من كانون

أمسّي أبذكرياتي وياهن أتعلل

أسافر بالحلم وأنزل على الجولان

وتل عنتر أصعده وفوكه أترجل

و(أحمد عيد*) جندي الباسل المغوار

المسرفن أذراعه المدفعه أتهدل

يملي للقنابل حافي ويهوّس

وكبل جَرة الحبل وّي مدفعه هلهل

حنه الكاع دمه وصاين الأوطان

شهيد وبالجنان ونجمه ما يأفل

لو ما جيشكم صد هجمة أسرائيل

جاقادة عربكم ذلة تتزنجل

وصل منهم جزاء أمفخخ وذباح

ولا أنعاتب زلم من شين ما تخجل

أذن حقه الأحتلال الجيشك أيحله

لأن توجع ضربته وللعظم توصل

                            ***

شدوا أحزامكم ولدي يرفعة راس

أحلفك بالرساله وبيكم أتوسل

أسرج عالمنيه ورايتك شعلان

لبس يشماغ عزه وفوكها أتعكل

دكوا أحصونهم وأتّبع الأرهاب

وهدم فوك راسه بيته والمعقل

وجيش الأحتلال أنذكره أبوعده

طاح الطاغيه ومشكور من يرحل

لتزعل ولدنه ولد أبو الحسنين

يرّج الكون جيش عراقي من يزعل

وآخر أمنيه بنص ولدي أستشهد

مو ضابط مقاتل تامر وأقبل

                             ***