• مراسيل الكلب * ( شعر )
- تم إنشاءه بتاريخ الأحد, 12 أيلول/سبتمبر 2010 16:58
- الزيارات: 2120
حامد كعيد الجبوري
مراسيل الكلب *
ردا على الشاعر بشار بن برد الذي يقول
أذني لبعض الحي عاشقة والأذن تعشق قبل العين أحيانا
****
آنه مو بشار ويناغي الحبيب ....... وإنطه مفتاح الكلب بيد الإذان
عاشك وكلبي مراسيله تجيب ....... أعيوني وإذني وأيدي وإشفافي ولسان
************************
إعضاي كلها أمفتحه وتمتلك عين *** ع الجمال أمن الفجر تصحه وتطوف
أهناك ريم أتوجده وتندله زين *** أتعينه وبالليل تُكنصله وتحوف
الروح تخفك تركض وتاخذني وين*** الكلب أعمه وروحي بعيوني تشوف
حاير وولهان أكصد يا طبيب*** ويا طبيب أبوصفته ينطي الضمان
حتى لو حنظل ومن ثغرك أطيب*** ومن لُماك الحنظل العلتي أمان
************************
آني أفتيلك حُكم أشرب الراح *** وأغتصب قبلات من ثغر البدور
ودير كاسات الهنه الوجه الصباح*** وخمرتك كاسرها من ماي الثغور
وأطفي كل الشمع وأخدود الملاح*** تضوي وسراج الضوه أبنور النحور
وبالك أتصحي الفجر للعندليب*** والبلابل تصحه وتعوف المكان
إكسر أخماريتك وزيد اللهيب*** ومو حرام الخمره من ريج الحسان
****************
تغبش الفراشه تتخير ورود *** ورده بيضه وحمره تتطاير طرب
أتشم رحيق أبلهفه وتبوس الخدود *** هذا خد ريان ذاك الخد عجب
تسكر وتتمايل أبمسج النهود *** لا عسل يرويها لا بنت العنب
آنه فراشه تحوم أرضع حليب *** ومن ثغور الورد أستلهم معان
والغصن من تهجره الورده يشيب *** ويا غصن يقبل يهجره الأقحوان
********************
أتشوفني شايب وأفعالي شباب *** الروح خضره أتأكد أبكول وعمل
واليريد الورد يصبر للعذاب *** والورد يندل مجامينه النحل
ما تهاب النحله لا شوكه وعذاب*** المهم يرجع وبشليله العسل
لا تلوم أتأنب وتحسبها عيب *** أيصير ضوك العسل فشله أبهل الزمان
أنت قانع وآنه راضي أبهل النصيب *** والعمر لليحسبه لحظه وثوان
****************
من أنام أبحضن محبوبي طفل *** والطفل دللول من يغفه وينام
أيهزني شوكه وبمعانيه أنكتل*** الروح ما تصبر وتنهضلَه قيام
ميت آنه ومن يواصلني عدل*** المُـثله بالعشاك يحبيب حرام
هذا دستورك وإيمانك غريب*** إلك يهوه وتذبحه أبوكت الأذان
راح آمِن واتبع عشك الصليب*** أيقدسون المحب لا سيف وطعان
**********
إذن طرشه أنطي للرايد يلوم *** أبعقلي راضي والعقل ينعد نبي
آنه مو بيدي الكلب يهوه ويحوم*** ومن أريد أمتنع يسبيني سبي
ردت أنصحه عاند وخاصم النوم*** أيكول ديني الوصل والحب مذهبي
أحبسته جوه الضلع زاد أمن النحيب*** والنحيب أيفرح أفلان وفلان
والشماته علكم وهو اللبيب*** وبالدليل أقنعني وبحجته البيان
*****************
الله واعدنه أبخمر شبه الزلال*** وحور عين أتباهي كل نور البدر
أهنا حرام الخمره و هناكه حلال*** هي خمره والسكُر نفس السُكر
ربي خالقها وأتركها محال*** ومن أعوف الغزل شيفيد الشعر
لو يخليلي ألف مية رقيب*** أنه أنطيك العهد وأرهن رهان
أكسب آنه واليراهني يخيب*** بالخمر والحور متروسه الجنان
*****************
بناء القصيدة على طريقة الموشح الأندلسي وهي من بحر الرمل والذي يسمى عند الشعراء الشعبيون الموشح .
المتواجون الان
256 زائر، ولايوجد أعضاء داخل الموقع